Kryeministri Rama ndodhej në Berat për vijimin e fushatës elektorale për zgjedhjet vendore kur presidenti Meta deklaroi se ka vendosur të shfuqizojë dekretin për mbajtjen e zgjedhjeve në 30 qershor. Fillimisht ai tha se Presidenti ka bërë gabim dhe se këto zgjedhje do të mbahen në këtë datë. (lexo)
Ndërsa nuk e ka fshehur irritimin për këtë vendim ai është shprehur se e priste gjithsesi dhe se:
“Ne jemi gati dhe i kemi marrë të gjitha masat. Gabojnë shumë me këto lëvizje që bëjnë bëjnë se unë jam gjithnjë tre lëvizje para. Edhe një gjë të fundit. Kur i shikoni që bërtasin, se unë i njoh mirë për fat të keq, mos harroni asnjëherë që bërtasin nga frika e tyre Ata kanë frikë të madhe dhe nuk kanë faj, janë të paaftë, dembelë dhe të pabesueshëm. Nga frika e tyre do treten.”, u shpreh kryeministri pa zbuluar me shumë detaje për skenarin që ka gati për mbajtjen e zgjedhjeve ne 30 qershor.
Nderkohë opozita e bashkuar sot mban protestën e 8-ë kombëtare, ndërsa prej 16 shkurtit ka nisur një sagë protestash para Kryeministrisë, Parlamentit dhe institucioneve më të rëndësishme në vend.
Deputetët e PD-së dhe LSI-së vendosën të digjnin mandatet e tyre në shkurt të këtij viti pas zbulimit të disa hetimeve të prokurorisë së Krimeve të Rënda se zyrtarë të lartë kanë ndërhyrë nëpërmjet shitblerjes së votës në zgjedhjet e shkuara parlamentare.
Kjo kauzë e opozitës u përforcua dhe pas artikullit të tabloidit gjerman BILD ku u publikuan 6 përgjime të bisedave të zyrtarëve të lartë të PS-së në Durrës me eksponentë të rrezikshëm të krimit, jo vetëm në vend.
Lideri i PD-së, Lulzim Basha në protestën e së dielës së shkuar paralajmëroi se nuk do të kishte më fjalë dhe se në protestën e ardhshme fjala do ti lihej sovranit.
