Gjatë valës së të nxehtit që goditi 60 rajone të Francës në fillim të verës 2025, midis 19 qershorit dhe 6 korrikut, në vend u regjistruan 480 vdekje shtesë krahasuar me nivelet normale për sezonin, një rritje prej 5.5%, njoftoi sot Ministria e Shëndetit Publik të Francës.
Ky numërim i parë pritet të përfundojë me llogaritjen e vdekshmërisë që do t’i “atribuohet posaçërisht të nxehtit”, në një raport që do të bëhet pas 15 shtatorit, sqaroi autoriteti shëndetësor.
“Të moshuarit 75 vjeç e lart përbëjnë pothuajse të gjithë” vdekshmërinë e tepërt nga të gjitha shkaqet, siç është regjistruar, përkatësisht 410 vdekje, +6.7% në rrethet e prekura nga ky “episodi i nxehtësisë së fortë, i dallueshëm për kohëzgjatjen dhe natyrën e hershme, në pothuajse të gjithë provincën”, i cili prek pothuajse tre të katërtat, 74% e popullsisë.
Kjo llogaritje e vdekshmërisë së tepërt bazohet në të dhënat e vdekshmërisë nga të gjitha shkaqet e lëshuara nga regjistri civil dhe të transmetuara nga Insee, Instituti Kombëtar i Statistikave dhe Studimeve Ekonomike, krahasuar me një numër të pritur vdekjesh bazuar në gjashtë vitet e mëparshme, duke përjashtuar ngjarjet ekstreme.
Rajonet ku vdekjet e tepërta janë më të larta janë Provence-Alpes-Côte d’Azur me të paktën 140 vdekje +9.2%, ndërsa tre rajone administrative, Korsika, Hauts-de-France dhe Île-de-France, nuk regjistrojnë vdekje të tepërta gjatë ditëve të valës së të nxehtit.
“Këto ndikime shëndetësore nxjerrin në pah rëndësinë e zbatimit të masave parandaluese për të zvogëluar ndikimin e të nxehtit, gjatë valëve të të nxehtit, por edhe gjatë gjithë verës dhe nevojën për një strategji përshtatjeje ndaj ndryshimeve klimatike, në nivel kombëtar dhe rajonal”, theksoi Santé publique France gjatë një konference për shtyp.
