I pari në listën e PDIU-së në Kukës, por dikur deputet i PD-së, çfarë thotë Fatos Hoxha për zgjedhjet

Ish-deputeti i Partisë Demokratike Fatos Hoxha, i cili ka kaluar me PDIU-në e Shpëtim Idrizit, është i pari në listën e PDIU-së në qarkun e Kukësit për zgjedhjet e ardhshme.

Në nisjen e fushatës elektorale, gjatë një fjalimi ndryshe nga çdo politikan tjetër, betejën për zgjedhjet Hoxha nuk e ka cilësuar si luftë, por si një ngjarje të bukur.

“Beteja që na pret deri në zgjedhje nuk është luftë, është një ngjarje e bukur, nuk mbjell viktima, por demokraci.

Ne duhet ta zhvillojmë atë pa u lodhur dhe me gëzim, sepse është beteja e shqiptarëve, bëhet veç për Atdhe.”, ishin fjalët e Hoxhës.

FJALIMI

I nderuar Kryetar i PDIU, të nderuar kandidatë për deputet,

PDIU dhe ju, po nisni sot fushatën elektorale nën moton “Veç një Atdhe!”, me një moto që shpreh dashuri, patriotizëm, bashkim dhe shpresë.

Unë besoj, se asgjë nuk mund të motivojë në këto zgjedhje më shumë se dashuria, patriotizmi, bashkimi dhe shpresa.

Janë vlera të pamohueshme, janë vlera për të cilat kemi nevojë, janë vlera që na bëjnë krenar, por janë dhe vlera që duhet t’i bartim dhe përçojmë në çdo skaj. KUDO! Atje ku njerëzit marrin pjesë në zgjedhje dhe atje ku bojkotojnë, atje ku na duan dhe na dëgjojnë, atje ku na mbështesin e na votojnë, por edhe atje ku nuk mendojnë si ne, nuk na pëlqejnë dhe na kontestojnë.

Ju kandidoni me një angazhim solemn, me angazhimin për të punuar për popull e për Atdhe, me bindje, zell e përkushtim.

Por, ju dhe unë, e dimë se kjo fushatë vjen në kohë të vështira, në kohën e sherrit dhe të mospajtimit.

Në një kohë si kjo, elefantët e politikës humbin edhe sytë e ballit edhe sytë e mendjes, harrojnë popullin dhe bëhen viktima të egos së pafund.

Zgjedhjet janë momenti kur populli duhet t’i thotë NDAL elefantëve egoistë.

Në një moment si ky ne duhet të jemi pranë popullit, jo pranë sherrit, duhet të ofrojmë zgjidhe dhe jo të ushqejmë konflikt, duhet t’i përbetohemi ligjit, jo dhunës, as abuzimit me pushtetin.

Në një moment si ky, ne duhet të japim shembullin dhe të respektojmë të parët sovranin.

Ne ndjehemi sot pjesë e vlerave reale të politikës, sepse ne i duam dhe i respektojmë njerëzit. Ne nuk jemi fallco dhe hileqarë.

Ne jemi të pastër dhe të sinqertë.

Ne jemi të përulur dhe modestë.

Ne jemi po aq njerëz sa dhe njerëzit që do na votojnë.

Sot që kandidojmë ne e kemi bërë tonin, leksionin nr.1 të politikës. Përvoja jetësore na ka mësuar se:

Nuk ka Atdhe pa një popull sovran!

Nuk ka popull sovran pa liri!

Nuk ka liri pa demokraci!

Nuk ka demokraci pa votë të lirë!

Nuk ka votë të lirë pa garë!

Gara jemi ne dhe ajo çfarë ne përfaqësojmë.

Ne kemi kurajon dhe vendosmërinë, ne kemi fjalën, veprën dhe besueshmërinë.

Ne jemi vetvetja, ndaj për ne është e lehtë të përballemi ne garë para sovranit, ndaj ne nuk kemi frikë nga konkurrimi dhe fjala e dhënë.

Beteja që na pret deri në zgjedhje nuk është luftë, është një ngjarje e bukur, nuk mbjell viktima, por demokraci.

Ne duhet ta zhvillojmë atë pa u lodhur dhe me gëzim, sepse është beteja e shqiptarëve, bëhet veç për Atdhe. (D.D/Shuplaka)