Është përcjellë sot për në banesën e fundit 50-vjeçarja Drita Saliaj, e cila u vra nga tre adoleshentë në 5 Janar, mes tyre dhe nipi i bashkëshortit të saj, në një tentativë që të rinjtë kishin kryer për të grabitur banesën e saj.
Teksa ka folur për mediat në varrimin e të shoqes, Hajir Saliaj ka kërkuar drejtësi për vrasjen, ndërsa ka shtuar se nipin nuk do ta falte për krimin edhe sikur ta kishte djalin e tij.
“Kërkoj drejtësi kaq dua. Edhe pse nip nuk e fal, edhe fëmija im të ishte nuk bëhet, ai krim duhet të ndëshkohet patjetër”, është shprehur Saliaj mjaft i indinjuar.
L. Saliaj, S. Shehaj të dy 16 vjeç dhe Ervis Zotaj 26 vjeç kishin shkuar si mysafirë në banesën e viktimës, e cila iu kishte bërë dhe kafe.
Në momentin që ata kanë tentuar që të grabisin banesën, kanë hasur në rezistencën e 50-vjeçares, të cilën pasi e kanë rrahur dhe e kanë lidhur me litar, e kanë hedhur të gjallë në një rezervuar që ndodhet të paktën 5 kilometra larg banesës së saj.
Tre të rinjtë kishin shkuar në banesën e Dritës, me shpresën se do të gjenin para, pasi së fundi ajo kishte shitur një lopë, si dhe kishte informacione se i kishin dërguar para nga Greqia burri dhe djemtë që ndodheshin në emigracion.
Por sipas fqinjes, Drita Saliaj nuk mbante para në banesën e saj, dhe I mbyllte ato në një llogari bankare. 16 vjeçari Saliaj dyshohet se ishte përdorues i lëndëve narkotike, ndërkohë që babai i tij vuante një dënim në burgun e Fierit për trafikim narkotikësh.
Policia i arrestoi të tre të rinjtë, që dyshohet se kishin kryer dhe grabitje të tjera në fshatin Gjerbës.
(E.K/Faxweb.al)
Discussion about this post