IPR Marketing dhe Ora News ballafaquan sot në një konferencë për mediat suksesin me rezultatet e exit-poll që i ranë në kokë rezultatit final të zgjedhjeve parlamentare të 25 qershorit.
Presidenti i Ora News, Ylli Ndroqi, tha se Ora News dhe IPR Marketing do të vazhdojnë kontratën edhe për 5 vitet e ardhshme, pra për zgjedhjet lokale të vitit 2019 dhe ato të përgjithshme të vitit 2021.
“Për këtë duhet të jemi të lumtur dhe sinqerisht të jemi të gjithë krenarë që kemi dhënë një mesazh tek publiku shqiptar dhe një të vërtetë që sot politikës shqiptare nuk i pëlqen e vërteta. Unë i them poltikës shqiptare ta pranojë të vërtetën se normal është e rëndë që ta pranosh atë, por do ti shërbejë për zgjedhjet në vazhdim, sidomos për zgjedhjet e 2019”, u shpreh Ndroqi.
Drejtori i IPR Marketing Antonio Notto tha se nëse PD dhe LSI do të kishin lexuar më mirë rezultatet e sondazhe të publikuara në Ora News mund të kishin tjetër rezultat në zgjedhje, sikundër shprehu rezerva mbi ekzagjerimin e pritshmërive të PS.
“Nëse kryetari i PD do u kishte kushtuar vëmendjen e duhur sondazheve tona do të kishte verifikuar se në fushatën zgjedhore partia po humbiste besimin. Nga 35-36% një muaj përpara zgjedhjeve arriti në 30% javën e fundit para zgjedhjeve. Shembulli i dytë është për LSI. Nëse do ti kishin parë me vëmendje sondazhet tona do të kishin vënë re që partia e tyre nuk ka ofruar konsesus gjatë fushatës zgjedhore, as nuk ka fituar dhe as ka humbur”, tha Notto.
(M.D/Shuplaka)
Discussion about this post