I rrahën dhe arrestuan, tërhiqet qeveria përballë protestës së banorëve në Shkozë, Gjebrea: Do rishikojmë projektin

Banorët e Shkozës nisën dje një protestë që zgjati disa orë për prishjen e banesave të tyre për shkak të zbatimit të projektit të ‘’Unazës së Re”. Burra dhe gra, fëmijë u ulën në rrugë për të kërkuar një të drejtë minimale, atë të pronës së tyre.

Askush nuk është kundër zhvillimit të infrastrukturës në qytet, po ama jo ndryshime për të mirën e të tjerëve në kurriz të tyre.

Në fakt protesta duket se ka dhënë efektet e para. Deputetja socialiste e zonës Elona Gjebrea ka njoftuar se me porosi të kryeministrit Rama është ngritur një grup ndërinstitucional për shikimin e ankesave të banorëve.

Drithëruese ishin të qarat e një fëmije që protestonte kundër shoqërimit të prindërve të tij nga ana e Policisë. E ndoshta për shkak edhe të mediatizimit që situata mori ka bërë që qeveria të vihet në lëvizje.

“Do doja të informoja mbarë opinionin publik, se jam maksimalisht e angazhuar për zgjidhjen e situatës me banorët e Shkozës në lidhje me prishjen e banesave për shkak të ndërtimit të Unazës së Re. Kam qenë në komunikim të vazhdueshëm me ta, si përpara fushatës dhe pas saj, përfshirë këtu edhe ditën e sotme ,ku para disa minutash ,mbarova takimin me qytetarët.

Dëshiroj të sqaroj, se ne nuk e kemi shfrytëzuar këtë situatë për të kërkuar vota apo mbështetje tjetër nga ata. Por, si deputete e zonës, jam në mbështetje të tyre për zgjidhje të problemeve dhe jo shfrytëzime për qëllime partiake. Këtë nuk do ta bëj kurrë.

Një grup ndërinstitucional ,u krijua me porosi të Kryeministrit dhe me pjesëmarrje te Kryetari të Bashkisë, z. Erion Veliaj. Po bëjmë më të mirën, që qytetarët të sqarohen dhe t’ju ofrohen mundësi mbështetje në rastin e banesave pa legalizim dhe leje ndërtimi. Përfaqësia e ngritur nga banorët që preken nga ky projekt, do të informohen hap pas hapi për vijueshmërinë e këtij procesi.Faleminderit!”, shkruan Gjebrea.

Nuk dihet nëse zgjidhja që qeveria do të ofrojë do të jetë ajo që iu përshtatet interesit të banorëve, po e rëndësishme është që ka reagim, ka lëvizje. Protesta e tyre ka vlejtur, nuk mund të themi që ia ka vlejtur edhe pavarësisht dhunës së ushtruar mbi ta. 

(E.K/SHUPLAKA)