Zjarr në Kopshtin 21 në Kombinat të Tiranës. Redaksia e ”Shuplaka”-s mëson nga burimet e saj se një zjarr ka përfshirë kuzhinën e kopshtit publik sot në mëngjes.
Por ngjarja është mbajtur krejtësisht e fshehtë gjatë ditës, për mediet dhe publikun.
Sipas burimeve të sigurta, zjarri ka shpërthyer në pjesën e kuzhinës për shkak të një shkëndije elektrike.
Mësohet se zjarri është shuar menjëherë pa shkaktuar dëme në njerëz.
Nuk dihet me saktësi se sa ka qenë ora kur zjarri ka shpërthyer, por mësojmë se kopshti do të qëndrojë i mbyllur deri në normalizimin e situatës.
Ajo që dihet është se kopshti u përurua 2 javë më parë nga kryebashkiaku Erion Veliaj por ajo që nuk dihet është pse kjo ngjarje mbahet e fshehtë.
Një prind i një fëmije dëshmon për zjarrin, ndërsa shumë të tjerë janë në ankth për sigurinë e fëmijëve të tyre, pasi kanë dyshime të mëdha te sistemi elektrik. Nuk dihet nëse kompania rikonstruktuese ka vënë dorë mbi këtë sistem dhe nëse është problem i saj.
Në kopshtin publik numër 21 në kryeqytet shkojnë rreth 150 fëmijë./SHUPLAKA
