Shkëputjet e vazhdueshme të lojtarëve për të luajtur ndeshjet me Kombëtaret që nga fillimi i sezonit shqetësojnë trajnerin e Napolit, Mauricio Sarri. Sipas tij, duhet gjetur një zgjidhje, pasi është thuajse e pamundur që të punohet rregullisht me skuadrën me kalendarin aktual.
“Luajmë çdo 70 orë, nuk ekziston asnjë mënyrë për të punuar. Ose reformojmë kalendarin, ose nuk do të ketë mënyrë se si të punohet, pasi është e papërballueshme kur Kombëtaret marrin lojtarët në 33 ditë nga 90”, tha ai duke iu referuar shkëputjeve në shtator, tetor dhe nëntor të lojtarëve për ndeshjet me përfaqësueset përkatëse, shkruan ”panorama sport”.
“Tani po filloj ta kuptoj se pse trajnerët flasin vetëm për merkato dhe jo për punë, puna në këto nivele nuk ekziston më. A duhet zvogëluar numri i skuadrave në Serinë A? Ka pro dhe kundër pasi nga njëra anë zvogëlohet numri i ndeshjeve, nga tjetër i zhduket ëndrra e shumë qyteteve.
Unë e drejtoj gishtin nga Kombëtaret, duhen reduktuar ndeshjet e tyre dhe puna në klub do t’i dhurojë më shumë cilësi ndeshjeve. Përndryshe, duhet zgjedhur një periudhë në të cilën të luajnë vetëm përfaqësueset. Fakti që Napoli do të mund të punojë një javë nga fillimi deri në fund vetëm në dhjetor, tregon më qartësisht situatën”, tha Sarri para mediave.
