I shumëkërkuari Klement Balili, policia në dispozicion numër telefoni dhe 5 milionë lekë

Bëhet e ditur së fundmi se policia ka vendosur në dispozicion një numër telefoni dhe shumë të konsiderueshme parash, për cilindo që do të ofrojë informacion lidhur me vendodhjen e Balilit.

Është vënë në dispozicion numri i telefonit 069 41 09 188 dhe shuma prej 5 milionë lekësh. Policia garanton anonimatin për atë person që ka informacion apo ndihmon për kapjen e tij.

“5 milionë lekë për këdo që jep informacion për Balilin. Bashkë me qytetarët ndërtojmë një vend më të sigurtë. Marrim info në telefon, rrjetet sociale, apo çdo mënyrë tjetër.”, bëhet e ditur në njoftimin e policisë.

Jo pak herë, moskapja e Klement Balilit ka shkaktuar debate dhe akuza të ndërsjellta mes palëve politike në vend. Vetëm dy ditë më parë, ministri i Drejtësisë i shkarkuar nga detyra, Ylli Manjani akuzoi qeverinë me në krye Ramën për moskapjen e “Eskobarit të drogës”. Ai tha se deklaratat për Balilin kanë ndikuar në shkarkimin e tij.

Nga ana tjetër, ministri i Punëve të Brendshme, Saimir Tahiri, vazhdon të këmbëngulë se Policia e Shtetit nuk do të dorëzohet dhe po vijon punën për gjetjen e kapjen e të shumëkërkuarit Balili. (XH.A/SHUPLAKA)