Sekretari i Përgjithshëm i PD, Gazment Bardhi, ka folur për Fax News nga sheshi i protestës duke përgënjeshtruar deklarimet e policisë se ka marrë njoftime zyrtare që në protestë po ndodhin akte dhune e se do ndërhyhet për shpërndarjen e protestës.
Ndërkohë i pyetur nëse i druhen ndonjë veprimi tjetër të policisë ai ka thënë:
“Unë nuk kam dëgjuar gjë. Në telefonin tim nuk ka asnjë thirrje nga Policia e Shtetit. Asnjë akt dhune nuk është ushtruar nga protestuesit, ju jeni dëshmitarë. Ne jemi këtu, policia të mos provokojë. Ne nuk kemi asgjë me punonjësit e policisë, ata janë sigurisht në të njëjtin hall që ka secili prej protestuesve, janë në kushte të njëjta, familjet e tyre nuk kanë bukë për të ngrënë njësoj si protestuesit që janë në shesh, dhe të garantoj se shumica e tyre, nëse nuk do të ishin me uniformë, do të ishin përkrah nesh, sepse vuajnë nga e njëjta problematikë që vuan çdo shqiptar që është sot në shesh, i shkaktuar nga ata njerëz që janë mbyllur në atë godinë dhe po detyrohen me zor të flasin. Por kam përshtypjen që nuk dinë çfarë janë duke folur.”
Në vijimësi të fjalës së tij Bardhi ka treguar se nuk i trembet aspak policisë duke i dërguar kështu të fala Sandër Lleshaj.
“Nuk kam asnjë frikë. Të fala nga Sandër Lleshaj e gjithë strukturës poshtë tij. Sa kohë që e drejta e protestës është një e drejtë që shqiptarët e kanë fituar 30 vite më parë, as Sandër Kimiku e askush tjetër poshtë tij, as ndonjë militant i PS që ka marrë drejtimin e Policisë së Shtetit gjatë kësaj periudhe nuk mund t’i trembë – mua jo e jo – por as protestuesit e as qytetarët. Ne do të jemi këtu për të mbrojtur demokracinë, për të mbrojtur të drejtat që kemi fituar 30 vite më parë.”, tha Bardhi.
Discussion about this post