Gjykata e Tiranës ka dhënë më në fund vendimin për dënimin e vajzës nga Kamza, e cila verën e kaluar u akuzua se vodhi shtëpinë e reperit Getoar Selimi në zonën “Kodra e Diellit”.
Vetëm disa muaj pas ngjarjes, 17-vjeçarja me iniciale D.K. u dënua me 4 vjet e 6 muaj burg. Por ky dënim u reduktua në 3 vjet burg, për shkak të uljes së një të tretës si rrjedhojë e gjykimit të çështjes me procedurën e gjykimit të shkurtuar. Por pavarësisht kësaj, vajza nuk do të vuajë dënim në qeli.
Kjo sepse në fund Gjykata e Tiranës ka vendosur të pezullojë ekzekutimin e dënimit me burg, duke e lënë në liri me kusht për 5-vite rresht. Ndërkohë fajtor u shpall edhe i dashuri i saj, personi të cilit i ka dhuruar orën e Getoarit, pasi e ka vjedhur atë.
Edhe ai fillimisht u dënua me 4 muaj burg për akuzën e “moskallëzimit të krimit”, mirëpo gjykata e ka pezulluar edhe ekzekutimin e këtij dënimi. Ai do të qëndrojë në arrest shtëpie për një periudhë 18-mujore.
Verën e kaluar, vajza e re vodhi orën 35 mijë euroshe nga banesa e Getoar Selimit. Ajo e kishte patur të lehtë t’i futej reperit në shtëpi, pasi ishte e bija e pastrueses, që Getoari kishte punësuar për t’u kujdesur për apartamentin.
Në momentin e grabitjes Getoar Salimi dhe e dashura e tij moderatore, Marina Vjollca, nuk ndodheshin në shtëpi. (D.D/Shuplaka)
