I vranë djalin për një karikues, flet për herë të parë Pavllo Mihali: Një tjetër hall më mundon

Pak ditë pas vdekjes së Marvi Mihalit, që u vra me thikë për një karikues, ka folur për herë të parë babai i tij Pavlo Mihali.

Rekordmeni shqiptar në kërcimin me shkop në atletikë, në një prononcim për newsbomb.al, ka drejtuar sot një apel për mediet duke i duke i bërë thirrje të zbardhin me profesionalizëm e vërtetësi vrasjen e Marvit. Ky reagim vjen për mediat të cilat e kanë bërë Marvin pjesë të grupit që shiti celularin apo karikuesin.

“Një tjetër hall më mundon. Janë mediat, janë persona e njerëz dashakeqës, por që gjejnë vend në portale të ndryshme që nuk më lenë të qetë në hallin e madh që më ra.

Duan që Marvin ta fusin te grupi që shiti celularin apo karikuesin, që kishte e s’kishte lidhje me këta njerëz. Unë di ta them me gojën plotë, Marvi im nuk kishte lidhje me ata persona, as me personat që na bënë gjëmën. Nuk kishte lidhje as me celularin apo karikuesin, as nuk kishte shitur, dhe as nuk kishte blerë gjë. Nuk dinte asgjë se ç’do të ndodhte. Një shok i tij, Armendi, e mori me vete se do të shkonin diku sa të mbaronin një punë dhe do vazhdonin bashkë dhe aty ndodhi tragjedia”, është shprehur Pavllo Mihali.

Kujtojmë se studenti i Juridikut Marvi Mihali humbi jetën, pasi u qëllua me thikë në zemër pak para mesnatës së 1 gushtit 2017 në një rrugicë pranë stadiumit “Selman Stërmasi” në kryeqytet. Marvi ishte djali i vetëm i Pavllo Mihalit, atletit të njohur shqiptar, i cili prej vitit 1983 mban rekordin në kërcimin me shkop (5.21 metra). (D.D/Shuplaka)