Pas përfundimit të mbledhjes me 43 deputetë të opozitës Gazment Bardhi ka dhënë një deklaratë për mediat për të treguar rreth vendimeve të marra gjatë mbledhjes.
Gazment Bardhi: Së pari dua publikisht të falënderoj secilin nga kolegët e opozitës që u bënë pjesë e një takimi të domosdoshëm, të vonuar. Sot në takimin me rreth 43 deputetët të PD-së, Aleancës për Ndryshim kemi përcaktuar agjendën e sesionit parlamentar.
Bardhi, është shprehur mbi prioritetet që do të kenë deputetët e opozitës në sesionin e ri parlamentar. Pikat kryesore ku do të angazhohen, është Reforma në Drejtësi dhe ngritja e tre Komisioneve Hetimore.
Së pari, një Komision për koncesionet, PPP-të dhe problematikat në shëndetësi, një tjetër Komision Hetimor për “vjedhjen e të dhënave personale” dhe ndërhyrjet në sistemin TIMS dhe një tjetër Komision sipas Bardhit për zyrtarët të cilët kanë favorizuar nëpërmjet vendimmarrjes të afërmit e tyre.
Bardhi: Zgjedhjet e lira, çuarja e përpara e Reformës Zgjedhore e cila është bllokuar prej 2 vitesh, është vendosur si prioritet i punës së deputetëve të opozitës, duke rikonceptuar Komsionin Zgjedhor dhe detyrat që do duhet të përmbushë me afate dhe përgjegjësi të qarta. Është e papranueshme, që ndërsa opozita ka denoncuar masakrën zgjedhore të 25 prillit dhe 14 majit, të mos çojë përpara Reformën në Drejtësi. Kemi analizuar deri tani produktin e Reformës Zgjedhore dhe na rezulton se nuk ka pasur asnjë produkt prandaj nuk duhet të vazhdohet më kështu. Rikonceptimi i Komisionit është detyra kryesore. Çdo ditë përballemi me skandale të kësaj qeverie. Kemi vendosur ngritjen e tre komisioneve hetimore.
- Komision Hetimor për: Koncesionet, PPP dhe problematikat në shëndetësi.
- Komision Hetimor për: Të dhënat personale të qytetarëve, Patronazhistët dhe dyshimet serioze për ndërhyrje në sistemin TIMS.
- Komision Hetimor për: Të dhënat se si zyrtarë publikë marrin vendime për të pasuruar miqtë dhe familjarët e tyre. Do të ketë një komision përkatës dhe për këtë.
Gjatë mbledhjes, kryetari i Partisë Republikane, Fatmir Mediu propozoi që të ketë një mbledhje të përjavshme me qëllim unifikimin dhe diskutimet mes deputetëve të opozitës, gjë e cila u miratua nga të pranishmit.
Mbledhja e thirrur prej Gazment Bardhit vjen në një periudhë të vështirë për Partinë Demokratike. Në Kuvendin e 2 shtatorit, Kryedemokrati Lulzim Basha shkarkoi Bardhin si kryetar të Grupit Parlamentar, për ta marrë vetë këtë rol.
I pyetur mbi Bashën, Bardhi i uron “udhë të mbarë në bunkerin anti-amerikan”, sakaq shton se Kryedemokrati duhet të reflektojë mbi momentin në të cilën ndodhet Shqipëria cilat do të ishin pasojat e një opozite mosfunksionale.
“Nuk kam asnjë koment, ftesa për Bashën është t’i rikthehet misionit si opozitar. Apeli im është të reflektojë për momentin që ndodhet Shqipëria dhe që mosfunksionimi i opozitës mund t’i shkaktojë vendit”, ka thënë Bardhi.
Sipas deklaratës së tij, ky është një veprim për të mbajtur opozitën të fortë dhe të unifikuar përball atij që e quan “regjimi i Edi Ramës”.
(Xh.H/FaxWeb.al)
Discussion about this post