“Ia hodhëm”, fraza që nxori zbuluar grabitësit në Kamëz. Pse operacioni u quajt ‘hijet’

Janë arrestuar 2 autorët e dyshuar të vrasjes së dy netëve më parë në Kamëz, ku nga grabitja me armë humbi jetën pronari i marketit, Agim Buçi 53 vjeç, dhe mbeti e plagosur Merita Buçi, bashkëshortja e tij.

Çifti u sulmua nga Vladimir Kurti dhe Ruzhdi Hode, në sy të djalit të tyre të mitur 6-vjeçar.

Ndërkohë gazetarja e ‘’Fax  News’’, Xhensila Kodra ka ndarë detaje të reja në lidhje me arrestimin e dy autorëve.

Ka qenë fraza ‘’ia hodhëm” që dy të rinjtë kanë komunikuar përmes telefonit me njëri-tjetrin ajo që i ka nxjerrë ata zbuluar nga Policia.

Të dy personat e arrestuar kanë qenë mes 30 të shoqëruarve, që më pas u lanë të lirë në mënyrë që të grumbulloheshin provat e plota.

Të dy të rinjtë janë banues në zonën e Kamzës, dhe kanë pasur informacion në lidhje me aktivitetin tregtar të familjes Buci.

Rruga ku ndodhi ngjarja është e pandriçuar, çka e bënte dhe më të vështirë zbardhjen e ngjarjes, ndërsa disa dëshmitarë kanë parë vetëm hijet e të rinjve, ndaj edhe operacioni i policisë ka marrë të njëjtin emër.

‘’E vetmja provë që ka pasur fillimisht policia ka qenë fakti se dy të rinjtë kanë pasur precedent penalë. Ata u shoqëruan 20 minuta pas vrasjes në market dhe më pas u liruan. Në momentin që janë shoqëruar kanë qenë në banesat e tyre që gjenden pranë vendngjarjes.

Në momentin që janë shoqëruar, mbrëmjes e së mërkurës ata kanë mohuar që të jenë pjesë e ngjarjes së rëndë.

Ata kanë thënë që në momentet kur ndodhi ngjarja kanë qenë duke parë ndeshjen pasi kanë qenë në banesë. Banorët thonë se kanë parë vetëm hijet, shumë pranë minimarketit është një lokal, ku dëshmitarët kanë thënë se menduan se krismat kanë qenë fishekzjarre.

Ata janë mbajtur në vëzhgim nga Policia, dhe pasi menduan se kanë shpëtuar ata i kanë thënë  njeri tjetrit ‘’ia hodhëm”, ndaj ka ardhur dhe verifikimi i dytë i tyre. Pas provave që Policia iu ka vënë në dispozicion, kamerat e sigurisë, Kurti ka pohuar që ka qenë autor i ngjarjes po nuk ka dhënë shumë detaje. E vetmja gjë që kanë pohuar ata është se paratë iu duheshin për shlyerjen e një borxhi që kishin”, u shpreh Kodra.

(E.K/FAXWEB.AL)