Forca ajrore izraelite ka njoftuar se do të sulmojë Distriktin 3 të Teheranit, pasi më herët njoftoi në gjuhën perse popullsinë civile të evakuohej.
Sipas mediave iraniane, Distrikti 3, i vendosur në verilindje të Teheranit, është shtëpia e mbi 1 milionë njerëzve. IDF paralajmëroi popullsinë të largohet nga zona, përpara se të fillonte sulmet. Është hera e parë që Izraeli njofton popullsinë vendase që nga fillimi i luftës të premten e kaluar.
IDF bën të ditur se objektiv i sulmit do të jetë infrastruktura ushtarake e Iranit e pozicionuar në këtë pjesë të kryeqytetit iranian.
Mesazhi i njoftimit u publikua nga faqja izraelite e internetit Ynet, ku zëdhënësi Kamal Pinhasi tha se ishte një “paralajmërim urgjent për ata që punojnë ose janë në Distriktin 3 të Teheranit”.
“Në orët në vijim, IDF do të veprojë në zonë”, shtoi ai, “për të goditur infrastrukturën ushtarake të regjimit iranian”. “Për sigurinë tuaj, ju kërkojmë që të largoheni menjëherë nga zona e shënuar në hartë në Distriktin 3”, tha ai. “Prania juaj në zonë vë jetën tuaj në rrezik”.
Më herët gjatë ditës Izraeli kreu sulme ajrore me avionë bombardues në pjesën perëndimore të Teheranit.
Sulme ajrore ka paralajmëruar edhe Irani ndaj Izraelit orët në vijim.
