Idrizi akuza ndaj Dukës dhe Gjikës, kërkon hetim nga Prokuroria

Administratori i Flamurtarit, Sinan Idrizi, në një prononcim për “Tv6plus1 Vlora” ka folur rreth ecurisë së këtij viti të ekipit që ai menaxhon. 

Idrizi e ka cilësuar “vit të dështuar” ndërsa theksoi që do ta përforcojë ekipin në merkaton e janarit.
Ndër të tjera kreu i vlonjatëve ka kërkuar që Prokurorija të hetojë menaxhimin e ekipit gjatë periudhës së drejtuar nga Shpëtim Gjika. I cili sipas Idrizit ka bashkëpunuar me Armando Dukën.

I pyetur nga gazetari për menaxhimin që i është bërë klubit në të kaluarën nga Bashkia, ai tha:

“Ka qenë strukturë “as mish e as peshk”. Një strukturë që menaxhohej si u donte qejfi. Shpëtim Gjika ka thënë se cili është ai që bilbilos dhe cili është ai që mashtron. Prokuroria të marrë masat dhe të hetojë dosjet kush e ka bërë evazionin fiskal. Të hetohen edhe ku kanë shkuar paratë që klubi ka fituar nga pjesëmarrja në Europë dhe nga fitimi i Kupës së Shqipërisë. Gjika nuk e di çfarë është qytetari i ndershëm dhe civil që paguan taksat, pasi çështjen civile nuk e ka të tijën. Gjika ka qenë askushi te Flamurtari. Ka bërë kontratë me Gjokën 50 mijë euro kur buxheti i klubit për futbollin ishte 400 mijë euro. Unë do t’u kërkoj çfarë janë paguar vjet nga unë. Çështja “Gjoka” nuk është e imja”.

FSHF-ja dhe çështja Gjoka

Unë kam mbetur i shokuar për çështjen “Gjoka” kur kam parë që Gjika të merrte përsipër të bisedonte me presidentin e FSHF-së, Armand Duka, dhe ta zgjidhte problemin. Gjika ankohej për Dukën për vjedhje kampionati. Në stadium nuk futeshe dot në kohën e Gjikës, se shahej Duka nga mëngjesi në darkë. Si u rregulluan këto marrëdhënie tani? Si ndikon Gjika te FSHF-ja që të shtyhej vendimi? Domethënë këta kanë bashkëpunuar ekonomikisht bashkë, vëllazërisht dhe inshallah nuk bashkëpunojnë politikisht tani.