Kreu i PDIU Shpëtim Idrizi ka thumbuar sot Dashamir Tahirin, i cili do të kandidojë për deputet në listën e PD-së në Vlorë. Duke folur për renditjen i pesti në listë të Dashamir Tahirit dhe i treti Vangjel Dule, Idrizi tha se PD në Vlorë nuk ka marrë asnjëherë 5 deputetë dhe aq më pak do t’i marrë kësaj radhe.
Idrizi kujtoi po ashtu një deklaratë të Tahirit kur kishte thënë se do e kapte Vangjel Dulen për veshi, ndërsa kësaj here, për shkak të renditjes, Idrizi tha se ai do ta marrë kalipiç kreun e PBDNJ-së.
“Në listën e PD-së i 3 është Vangjel Dule i 5 Dashamir Tahiri. Një konfigurim i tillë i padrejtë jo vetëm i padenjë. PD nuk ka pasur asnjëherë 5 deputetë dhe akoma më pak do të arrijë kësaj radhe. Atëherë nuk e kuptoj se ky i pesti ça kërkon aty. Do thoni ça keni me zotin Dule. Ka qenë një person që vazhdimisht është bërë ngacmues pa sens duke thënë që çështja çame nuk ekziston.
Një rast kur kërkuam 1 minutë heshtje në parlament 139 deputetë u çuan më këmbë vetëm Dule jo, sikur donte të provokonte. Mbaj mend që Dashi ishte shumë i nxehur dhe mezi po e mbanim të shkonte të rrihte Dulen.
E pashë në një intervistë që thoshte se do e kap për veshi t’i tregoj tokat e Çamërisë por kësaj radhe me sa duket do e marrë kalapiç. Do punojë që të fitojë Dule”, tha Idrizi.
(M.D/Shuplaka)
