Inspektorati Kombëtar i Mbrojtjes së Territorit vazhdon aksionin në Elbasan, në zonën e spitalit “Xhaferr Kongoli” për prishjen e disa objekteve disa katëshe. Aksioni i IKMTS-së në këtë zonë të qytetit vazhdon prej rreth pesë ditësh.
Ditën e nesërme, aksioni do të përqëndrohet në qytetin e Vlorës, ku do të kryhet shpërthimi i kontrolluar i dy objekteve, tre dhe pesë katëshe. Mësohet se janë hapur 500 vrima dhe do të përdoren 15 kilogramë eksploziv. Për të shmangur dëmtimin e objekteve pranë tyre, do të vendosen rreth 1.000 thashë me rërë.
“Nesër në Vlorë, IKMT do të kryejë shpërthimin e kontrolluar të dy objekteve. Ky operacion kryehet në kuadër të projekteve “Rikualifikimi urban përgjatë shëtitores” dhe “Ndërtim rruge, unaza Vlorë-Uji I Ftohtë”. Objektet tre dhe pesë katësh janë skualifikuar nga ALUIZNI.
Për shembjen e tyre, janë hapur 500 vrima dhe do të përdoren 15 kilogramë lëndë shpërthyese. Janë marrë masat duke vendosur rreth 1 mijë thasë me rërë, për të siguruar mosdëmtimin e objekteve që ndodhen pranë.”, citohet në njoftimin e Inspektoratit Kombëtar të Mbrojtjes së Territorit.
(XH.A/SHUPLAKA)
