Në një intervistë për Fax News, Ilir Alimehmeti komentoi raportin e fundit të OSBE/ODIHR për zgjedhjet në Shqipëri, duke e cilësuar atë si një tjetër dëshmi se procesi zgjedhor nuk ka qenë as i lirë dhe as i ndershëm.
Alimehmeti theksoi se administrata publike është vënë në funksion të një partie të vetme, ndërkohë që sistemi elektoral aktual është produkt i një marrëveshjeje bilaterale mes PS dhe PD, që sipas tij, dëmton rëndë opozitën dhe në mënyrë të veçantë partitë e vogla.
“Ky sistem i deformuar zgjedhor ka rritur mosbesimin e qytetarëve. Çdo vit e më shumë, njerëzit nuk shohin arsye të dalin në votime. Kjo është një sinjal alarmi për shëndetin e demokracisë sonë,” tha Alimehmeti.
Ai kritikoi ashpër faktin që zonat elektorale tashmë nuk përfaqësohen më nga deputetë konkretë, duke shtuar se kjo largon edhe më shumë qytetarët nga përfaqësimi politik.
Gjithashtu, Alimehmeti kujtoi edhe deklaratat publike të kryeministrit Edi Rama gjatë zgjedhjeve të pjesshme në vitin 2023, ku sipas tij, ai bëri thirrje që qytetarët të mos merrnin pjesë në votime – një tjetër tregues, siç e quajti ai, se vendi nuk ndodhet më në një demokraci funksionale.
