Kryetari i Partisë së Lirisë, zoti Ilir Meta, ishte sot në Korçë, ku foli për situatën aktuale në Shqipëri dhe atë të opozitës.
Ai akuzoi kryeministrin se ky i fundit po shmang llogaridhënien përsa i përket çështjeve si koncensionet, apo inceneratorët. Sipas tij qëllimi i tij është të asgjësojë pluralizmin dhe të përçajë opozitën.
Të gjitha këto ai i cilësoi si produkt të “Ramaformës”.
Deklarata e Metës:
“Opozita është në këtë situatë të vështirë dhe tepër sfidante, sepse kemi të bëjmë me një projekt të mirëplanifikuar prej kohësh për asgjësimin e pluralizmit politik në Shqipëri. Ndaj nuk ka qenë rastësi djegia e mandateve nga ana e opozitës dhe lënia e gjithë parlamentit për këto 2 vite Edi Ramës, për të bërë dhjetra ligje me porosi për të kapur drejtësinë, por njëkohësisht dhe për të shmangur llogaridhënien për koncensionet që janë tërësisht të pamonitorueshme. Çështja e inceneratorit është bërë më vizibël, për shumë arsye, por ka dhe shumë koncensione në fushën e shëndetësisë, infrastrukturës e kudo tjetër. Opozita pa asnjë diskutim ka përgjegjësitë e saj, por po lufton në mbrojtje të pluralizmit politik për kushtetueshmërinë, për të kthyer Kuvendin në funksionin e tij që e ka humbur prej kohësh dhe është në aksion të vazhdueshëm. Çdo ditë, mazhoranca ka vetëm një qëllim, asgjësimin e pluralizmit politik dhe përçarjen e opozitës. Unë besoj se qytetarët janë shumë të qartë për pasojat që po paguajnë, për këtë situatë të degradimit të demokracisë. Besoj se do të japin kontributin e tyre në fuqizimin e opozitës. Ne të gjithë do të bëjmë punën tonë më shumë se deri tani.”
Zoti Meta u pyet nëse ka frike se do merret masë ndaj tij, si rasti i arrestit në shtëpi i zotit Berisha.
“Drejtësia me rregji bashkë me një realitet prej kohësh. Është pa asnjë diskutim një produkt i Ramaformës, që është tjetërsimi i drejtësisë në reformë, sipas Kushtetutës që u bë me 140 vota.
Përmes shkeljeve të saj, nga reformë në një “Ramaformë” të shërbimit të tij, përmes kapjes të këtyre institucioneve, dhe përmes direktivave në partinë e rilindjes për ta orientuar atë drejt goditjes së opozitës dhe së dyti për të shmangur vëmendjen nga skandalet që ulërasin të qeverisë. Kjo është arsyeja që ata s’guxojnë të përmendin emrin e Edi Ramës në skandale, edhe në atë të inceneratorëve dhe të tjera. Kjo është arsyeja që izolohet zoti Berisha, lideri i partisë kryesore opozitare, ndërsa të gjithë e dinë që për çështjen për të cilën ai izolohet, vendimin për tjetërsimin e klubit sportiv Partizani, nga një klub sportiv në një kompleks ndërtimesh, e ka bërë vetë Edi Rama.”, tha Meta.
Discussion about this post