Ish-Presidenti i Republikës, Ilir Meta, ka reaguar me një deklaratë të fortë ndaj asaj që ai e cilëson si “mashtrime të rënda dhe fabrikime mediatike” lidhur me hetimet për çështjen e inceneratorëve dhe përfshirjen e tij të supozuar në përdorimin e kartave bankare të huaja.
Meta mohon kategorikisht çdo lidhje me kartat bankare të përmendura në media, duke i cilësuar akuzat si të pavërteta dhe të pabazuara në fakte. Ai thekson se nuk ka ekzistuar dhe nuk ekziston asnjë kartë bankare në emrin e tij apo të bashkëshortes, Monika Kryemadhi.
“SPAK-u po mashtron hapur duke përdorur burime të dizinformimit që kontrollohen nga regjimi i narkoqeverisë,” thuhet në deklaratën e Metës. “Të gjithë këto lajme janë pjesë e një skenari politik të urdhëruar për të më goditur personalisht, ndërkohë që asnjë provë e vetme nuk është paraqitur.”
Meta shton se Prokuroria e Posaçme është zhveshur nga çdo besueshmëri përpara opinionit publik dhe se e gjithë çështja kundër tij është, sipas tij, “një aferë mafioze dhe e telekomanduar”.
Në deklaratën e tij, ish-Presidenti thekson se kurrë nuk ka pasur interes për luksin apo udhëtimet në destinacione si Las Vegas apo Beverly Hills, duke nënvizuar përkushtimin e tij për natyrën dhe bukuritë shqiptare: “Unë kam bërë zgjedhjen time, të vizitoj me kënaqësi Prevallën, Çeremin, Dobërdolin, majën e Korabit e të Jezercës dhe çdo perlë natyrore të Shqipërisë.”
Deklarata e Metës vjen në një kohë kur ndaj tij janë ngritur akuza publike për përfshirje në dosjen e inceneratorëve, për të cilën ai pretendon se është një skenar i motivuar politikisht.
https://www.facebook.com/photo?fbid=1267849211376978&set=a.402543184574256
