Presidenti i vendit Ilir Meta ka qenë i pranishëm ditën e sotme në fshatin Vajzë në Vlorë, ndërkohë që ka recituar edhe disa vargje pranë bustit të Perlat Rexhepit.
“Çka po thotë kadija në flakë le të kallet shtëpia ta marrë veshë Shqipnia se ne i dalim zot. Çka po thotë Perlati burra bëhi gati, se ka ardh sahati t’hujt me u vënë barut…”- recitoi Meta, ndërkohë që u prit me duartrokitje.
Në një shkrim në rrjetet sociale, Meta po ashtu ka publikuar disa foto ku shihet i rrethuar nga fëmijët, për të cilët shkruan se është i lumtur që fëmijet e Vajzës ishin në këtë ceremoni nderimi
“Përballë bustit të poetit atdhetar Ali Asllani në Vajzë qëndron edhe busti i Heroit të Popullit,
Perlat Rexhepi, i cili bashkë me dy shokët e Tij, Jordan Misjen dhe Branko Kadinë bënë epopenë e Tre Heronjve të Shkodrës, një prej ngjarjeve simbol të Luftës Antifashiste.
Ndërsa Besëlidhja e Mesaplikut ishte frymëzuese edhe për epopenë e Luftës së Vlorës në 1920, padyshim që kjo e fundit ishte frymëzuese për Perlat Rexhepin dhe gjithë heronjtë e tjerë në Luftën Antifashiste për çlirimin e vendit.
I lumtur të shikoja edhe fëmijet e Vajzës në këtë ceremoni nderimi. Gjaku i heronjve nuk do të bëhet ujë!”- shkruan Meta.
