Ish-presidenti dhe kreu i Partisë së Lirisë, Ilir Meta, ka reaguar ashpër ndaj Prokurorisë së Posaçme SPAK, të cilën e akuzon për shpërndarje dizinformacioni në media të financuara sipas tij nga paratë e aferës së inceneratorëve. Në një postim publik, Meta pretendon se SPAK po përpiqet ta diskreditojë përmes përfshirjes në akuza të rreme lidhur me një kartë bankare të padeklaruar, duke përmendur edhe autoritetet amerikane.
Ai shprehet se ka vendosur të publikojë të plotë përgjigjen e autoriteteve amerikane në lidhje me këtë çështje, në mënyrë që sipas tij të mos lejohet më tej diskreditimi i tyre nga një strukturë që vepron nën urdhra politikë.
Postimi i plotë i Ilir Metës:
“Organizata kriminale SPAK vazhdon të shpërndajë dizinformacione në televizionet dhe mediat e blera me paratë e pista të inceneratorëve, për fat të keq edhe në Televizionin Publik Shqiptar (RTSH), sikur gjoja autoritetet amerikane kanë përmendur emrin tim për një kartë bankare të padeklaruar.
Në respekt të së vërtetës dhe të ligjit, por edhe të mos lejimit të mëtejshëm të diskreditimit me qëllim të autoriteteve amerikane nga ana e SPAK, vetëm në funksion të axhendës së Narkoregjimit për asgjësimin e opozitës së vërtetë politike, po publikoj sot të plotë përgjigjen e autoriteteve amerikane në lidhje me çështjen dhe përdorimin e kartave bankare.
SPAK është kaq i zbuluar në të gjithë aktivitetin e tij kriminal që nuk ka lidhje me hetimin, por vetëm me urdhrin politik nga tribuna e Asamblesë së Partisë Socialiste, sa është i obsesuar të më mbajë mua të lidhur në çift me Monikën (SPAK njësoj si Pilo Peristeri që përpiqej të mbante çiftet me dhunë) duke shkruar qëllimisht edhe në akuzën zyrtare të 26 Majit statusin tim si i martuar, kur kjo marrëdhënie nuk ekziston prej kohësh në gjendjen civile të Republikës së Shqipërisë dhe ata e dinë shumë mirë.”
