Kreu i grupit Parlamentar të Lëvizjes Socialiste për Integrim Petrit Vasili, kërkon një referendum popullor për të vendosur mbi ligjin për importin e plehrave.
“Referendum popullor për plehrat.
Ligji për importin e plehrave u fut në mënyrë tinëzare në parlament një vit më parë, pasi kryeministri demagog e anulloi importin e plehrave me vendimin e tij të parë si kryeministër në shtator 2013.
Populli shqiptar është shumë i shqetësuar për pasojat e rënda mbi shëndetin e tij dhe të gjeneratave që do të vijnë.
Populli është shumë i shqetësuar që Shqipëria do të shëndrrohet në gropën e plehrave të të gjithë Europës, pasi me këtë ligj të gjithë llojet e sojet e plehrave do të derdhen në Shqipëri.
Zgjidhja është vetëm një REFERENDUM POPULLOR për t’i thënë po ose jo vërshimit të plehrave në Shqipëri.
Këtë vendim mund ta marrë vetëm populli pasi pasojat e tmerrshme mbi shëndetin dhe jetën do te bien mbi të dhe do ti vuajë vetëm ai.”, reagon Vasili.
Kujtojmë se kryeministri Edi Rama ka nxituar ta bëjë ligjin e importit të plehrave, pjesë e axhendës së Parlamentit, që në seancat e para. Ky projektligj është përfshirë në programin e punimeve të Kuvendit për periudhën 18 shtator-13 tetor 2017. (D.D/Shuplaka)
Discussion about this post