Deputetja e PDIU-së, Mesila Doda, reagoi së fundmi lidhur me incidentin me trenin serb në Kosovë. Në një reagim të djeshëm të saj, ajo u shpreh se nëse Presidenti i Serbisë e ka seriozisht kur thotë se do të ndërhyjë me ushtri në Kosovë atëherë duhet që Presidenti i Shqipërisë të marrë masa.
Sipas Dodës, kreu i Lartë i Shtetit shqiptar duhet që të thërrasë Këshillin e Lartë të Sigurisë Kombëtare. Ajo deklaroi se në këtë rast nevojitet që Shqipëria dhe Kosova të reagojnë si një komb.
“Nëse ky lajm është i vërtetë, presidenti duhet të mbledhë menjëherë Këshillin e Sigurisë. Ne duhet të sillemi si një komb, të lëmë mënjanë sherrnajat dhe të bllokojmë çdo përparim të pushtuesve serbë në tokat shqiptare. Qeveria e Kosovës dhe e Shqipërisë e kanë sfidë të përbashkët mbrojtjen e tokave shqiptare”, u shpreh deputetja, duke e shoqëruar me shprehjen “Një komb, një qëndrim.”, u shpreh Doda.
Lidhur me incidentin, partnerët ndërkombëtarë u shprehën se Serbia dhe Kosova duhet ta zgjidhin me dialog këtë çështje. Ndërkohë që politika shqiptare nuk ka dalë me një qëndrim zyrtar. (XH.A/SHUPLAKA)
Discussion about this post