Infektimi me koronavirs i 77-vjeçarit, izolohet gjithë fshati në Kosovë. Reagon Thaçi

Kryetari i Komunës së Vitisë, Sokol Haliti thotë se fshati Stubëll është izoluar si rezultat i paraqitjes së koronavirusit tek një burrë 77-vjeçar.

Haliti thotë se “Fshati Stubëll është izoluar komplet. Gjithashtu kemi bërë kërkesë të izolohet edhe familja e 77-vjeçarit i cili aktualisht gjendet në Prishtinë”.

Tutje, Haliti ka kërkuar që të furnizohen policët dhe punëtorët e shëndetësisë me masa mbrojtëse ndaj virusit.

“Aktualisht në karantinë janë 15 punëtorë të shëndetësisë. Kam kërkuar që të furnizohen policët dhe punëtorët te shëndetësisë me maska, dorëza e pajisje tjera, pasi që nuk kanë”, ka thënë Haliti.

Pas konfirmimit të këtyre dy rasteve, është deklaruar edhe Drejtoresha e Qendrës Kryesore të Mjekësisë Familjare, Vjollca Kadolli, e cila mëngjesin e sotëm i ka urdhëruar stafin mjekësor që e kanë trajtuar 77-vjeçarin dhe që kanë pasur kontakt me ambientin ku ai ka qëndruar, që të mos dalin nga objekti i QKMF’së.

Në një prononcim për Gazetën Express, Kadolli ka thënë se ajo bashkë me stafin janë duke qëndruar që nga mëngjesi në këtë objekt, derisa ka shtuar se masat e tjera pritet të merren nga komuna. Sipas saj, gjendja e stafit shëndetësor është e mirë.

Lidhur me rastinkka reaguar edhe presidenti Hashim Thaçi i cili lut qytetarët që të ndjekin të gjitha udhëzimet e autoriteteve.

Reagimi i Thaçit:

Të nderuar qytetarë,

Më herët u njoftova nga institucionet e vendit se tashmë janë konfirmuar rastet e para me virusin COVID19 në Kosovë. U bëj thirrje të gjithë qytetarëve të Kosovës, që t’i ndjekin me përpikëri instruksionet e dhëna nga institucionet tona përgjegjëse.

Kërkoj nga ju që ta menaxhojmë edhe këtë situatë pa panik, në koordinim dhe me kujdes të shtuar për njëri-tjetrin.

Ne, së bashku, do t’ia dalim! HTH