Ministri i brendshëm, Sandër Lleshaj i ftuar mbrëmjen e sotme në “Opinion” ka siguruar se data e zgjedhjeve lokale, 30 qershori, do të manifestohet paqësisht nga shqiptarët dhe se asgjë s’ka për të ndodhur. Lleshaj tha që për këtë deklaratë, iu referohet informacioneve të tij duke shtuar se, probleme sporadike në zgjedhje në Shqipëri ka patur përherë, por edhe në këtë situatë zgjedhjet do zhvillohen, pasi infrastruktura është gati.
Po ashtu, në lidhje me një përplasje të mundshme në 30 Qershor, Lleshaj ka thënë se nëse populli ngrihet kundër zgjedhjeve, policia nuk do të bëjë asgjë.
Sandër Lleshaj: Policia nuk është këtu për të përballuar pasivisht të gjithë popullin shqiptar. Në qoftë se ne kemi këtë ide që i gjithë populli shqiptar do të ngrihet kundër zgjedhjeve, policia do të bëjë asgjë, fare, s’do të merret. Sepse policia nuk është këtu për të frenuar popullin shqiptar që të bëjë atë që do populli shqiptar.
Blendi Fevziu: Nëse janë 10-15 përkrahës së opozitës në çdo qendër votimi, prapë është e pamundur.
Sandër Lleshaj: Policia ekziston për t’u marrë me kriminelët dhe policia shqiptare është plotësisht në gjendje të merret me kriminelët, sepse kriminelët janë pak, nuk janë shumë, nuk janë shumicë. Kriminelët janë pak në Shqipëri.
Blendi Fevziu: Po nëse dalin qytetarë në çdo qendër votimi?
Sandër Lleshaj: Në qoftë se, edhe një herë, policia nuk është për t’u marrë me të gjithë popullin shqiptar. Nuk është ky opsioni.
Blendi Fevziu: Pra nëse opozita do të arrijë të mundë të nxjerrë qytetarët, do të jetë e pamundur zhvillimi i zgjedhjeve?
Sandër Lleshaj: Në qoftë se opozita ka popullin me vete? Po opozita mund t’i fitojë zgjedhjet fare kollaj pastaj.
I pyetur se nëse ka informacione të klasifikuara si ministri, si polici, nga shërbimet e specializuara për problem të mundshme më 30 Qershor, Lleshaj shprehet se: “Kemi dhe informacione që mund të ketë tentativa për të shkaktuar probleme në nivelin kriminal të çështjes, por jo në nivelin civil.”
Ndërkohë, referuar gazit lotsjellës në protesta, Lleshaj tha se ky është standart i policisë për të evituar përplasjet, duke shtuar se gazi nuk vret pasi nuk ka lëndë helmuese luftarake në Shqipëri.
Blendi Fevziu: Zoti Lleshaj ju pra jeni të vendosur për të shkuar në zgjedhje më 30 Qershor?
Sandër Lleshaj: Ne nuk jemi të vendosur, ne jemi të detyruar për të shkuar në zgjedhje, ne jemi të detyruar prej Kushtetutës. Kush mund të ishte alternative…
Blendi Fevziu: Po kush ju detyron ju zoti Lleshaj të shkoni në një përplasje, që rrezikon të jetë edhe një përplasje civile?
Sandër Lleshaj: Jo nuk rrezikon të ketë përplasje civile, sepse nuk ka një konflikt civil në Shqipëri.
Blendi Fevziu: A keni ju informacione të klasifikuara si ministri, si polici, nga shërbimet e specializuara që mund të ketë probleme më 30 Qershor?
Sandër Lleshaj:Probleme mund të ketë më datë 30 Qershor. Probleme të nivelit të rendit publik, probleme të kriminalitetit, por jo probleme të konfliktit civil.
Blendi Fevziu: Keni informacione apo hamendje?
Sandër Lleshaj: Kemi dhe informacione që mund të ketë tentativa për të shkaktuar probleme në nivelin kriminal të çështjes, por jo në nivelin civil.
Blendi Fevziu: Çdo me thënë në nivelin kriminal të çështjes?
Sandër Lleshaj:Po grupe të caktuara kriminale, çdo ditë kemi probleme kriminale në Shqipëri. Grupe kriminale ose individë që zhvillojnë veprimtari kriminale ka shumë. Ata që dalin përballë ligjit janë kriminelë.
…..
“Polici është i paprekur, e kemi mësuar dorën keq. Nuk preket polici. Gazi është mjeti i shpikur për këtë punë, gazi nuk vret. Të detyron të largohesh nga ajo skenë ku ti nuk duhet të jesh. Nuk është armë. Lëndë helmuese luftarake Shqipëria nuk ka”,- ka thënë ndër të tjera Ministri, duke justifikuar përdorimin e gazit nga policia.
Discussion about this post