Instituti i Statistikave (INSTAT) raporton se numri i aksidenteve rrugore gjatë muajit Janar 2017 ka pësuar një rënie krahasuar me të njëjtën periudhë të një viti më parë. Konkretisht, numërohen 119 aksidente rrugore, 20.1% më pak.
Sipas INSTAT, numri i të aksidentuarve në janar 2017 është 158 persona nga 202 që ishte një vit më parë. Ndërsa numri mesatar i personave të vdekur gjatë kësaj periudhe u llogarit në 22 dhe krahasuar me mesataren e personave të vdekur gjatë vitit 2016, ky numër është ulur me 1,8 %.
“Aksidentet rrugore, në 83 % të rasteve, kanë ndodhur nga sjellja e drejtuesit të mjetit. Numri më i lartë i aksidenteve (26,1 %) është kryer nga grup mosha 16 – 25 vjeç.”, raporton INSTAT, përcjell “Monitor”.
Gjatë Janarit 2017, numri mesatar i të aksidentuarve, përfshirë këtu të vdekur ose të plagosur, ishte 5 persona për 100.000 banorë. Krahasuar me të njëjtën periudhë viti në 2016-ën, ky numër u ul me 31.8%.
Shkaqet më të shpeshta të aksidenteve rrugore janë: rëndimi i trafikut në rrugët kryesore, tejkalimi i shpejtësisë, mosrespektimi i rregullave nga shoferët ashtu edhe nga këmbësorët, konsumi i alkoolit. (XH.A/SHUPLAKA)
Discussion about this post