Sektori i Call Center vitet e fundit ka patur ndikim të lartë në tregun e punës në Shqipëri ku pjesa më e madhe e të rinjve e shikonin si mundësi punësimi.
Kjo vinte për shkak të rrogave të larta që ky lloj biznesi ofronte në krahasim me rrogat në Shqipëri si dhe për faktin se ishte një punësim part-time, çka u leverdis shumë studentëve të cilët njëkohësisht ndjekin edhe universitetin.
Rrogat të cilat për vetë kompanitë e Call Center-it shiheshin si mundësi e mirë për t’u zhvendosur e punuar në Shqipëri pasi e konsideronin si vend me krahë të lirë pune, në krahasim me Italinë.
Transferimi i punës në Shqipëri nënkuptonte më pak vende pune në shtetin fqinj. Kjo rritje e shpejtë, alarmoi autoritetet italiane, të cilat u gjendën nën presionin e humbjes së vendeve të punës në Itali dhe zhvendosjen e tyre në Shqipëri dhe filluan marrjen e masave drastike.
Në Itali, në datën 1 prill, hyri në fuqi ligji “Për delokalizimin” e call center, i cili shtrëngoi rregullat për zhvendosjen e aktivitetit nga Italia drejt shteteve jo anëtare të BE-së. I miratuar në dhjetor të vitit të kaluar, ky ligj alarmoi kompanitë Call Center në Shqipëri të cilat penalizoheshin për shkak se operonin në një vend që nuk është pjesë e Bashkimit Europian.
Për këtë arsye operatorët e tregut deklaruan se kompanitë mëmë po merrnin masa për të zhvendosur një pjesë të aktivitetit në vende të tjera në rajon si Rumania apo Bullgaria. Tashmë duket se rënia e aktivitetit të call center është bërë realitet.
INSTAT konfirmoi në raportin e prodhimit të brendshëm bruto të tremujorit të dytë se Grupi i Aktiviteteve profesionale dhe Shërbime administrative u shfaq me një rënie prej 2,31 % i ndikuar kryesisht nga rënia në aktivitetin e Call Center. Është hera e parë që ky sektor raporton rënie, pas rritjes së vrullshme vitet e kaluara. (B.N/SHUPLAKA)
