Instituti i statistikave raporton se krahas rritjes së taksave, ndërtuesit e apartamenteve po hasen dhe me një rritje të lehtë të kostove të materialeve të ndërtimit.
Kjo pasi sipas studimit të Instat, Indeksi i kushtimit në ndërtim në tremujorin e tretë të vitit 2016 arriti 102,6 kundrejt tremujorit të parë të vitit 2011 që ka qenë i barabartë me 100.
Ndryshimi vjetor i indeksit të kushtimit në ndërtim, për tremujorin e tretë 2016 është 0,1 %, ndërkohë që ndryshimi tremujor është 0,4 %.
Sipas parashikimit të ndërtuesve, edhe pa rritjen e kostove ata presin që çmimet e apartamenteve të shënojnë një tjetër rritje në janar të vitit të ardhshëm , të udhëhequra nga shtimi i kërkesës, por edhe nga reflektimi i rritjes së taksave.
Banka e Shqipërisë (BSH), në indeksin e çmimeve të banesave, ka konstatuar se ka pasur rritje çmimesh gjatë dy tremujorëve të parë të vitit 2016, që ka ndaluar në të tretin.
Sipas BSH, në tremujorin e dytë, indeksi i çmimit të banesave u rrit me 5.2%, pas rritjes me 11.3% një tremujor më parë. Por sipas revistës “Monitor”, ndërtuesit presin që rritja të rifillojë në muajt e parë të vitit të ardhshëm, ndërsa të tjerë konfirmojnë se rritja tashmë ka filluar.
Discussion about this post