Pas deklaratës së fundit së Daut Gumenit lidhur me autoritetin e hapjes së dosjeve ku e cilësoi këtë institucion si të dështuat dhe se nuk kishte bërë asnjë verifikim ka folur vetë Gentiana Sula drejtoresha e Autoritetit të Hapjes së Dokumenteve të ish-Sigurimit.
Sula ka deklaruar në studion e emisionit “Mirmëngjes Shqipëri” me gazetarin Enkel Demi se shqetësimi është real, por do të kërkohen ndryshime në ligj.
“Dauti përfaqëson denjësisht grupet e të burgosurve politikë. Tema e ligjit na ka shqetësuar. Në fund të vitit bëjmë analizën vjetore në parlament dhe në atë moment t’i bëjmë propozim Kuvendit që të përmirësojmë ligje. Gjermanët e kanë ndryshuar tetë herë këtë ligj. Shqetësimi tjetër i Dautit është buxheti dhe është shqetësim i drejtë. Është një institucion i ri, vumë këmbët ndërkohë që buxheti ishte bërë, por me buxhetin e ri do të kemi më shumë fonde”, u shpreh Sula.
Sjellim në vëmendje që Daut Gumeni, anëtar i “Autoritetit Për Hapjen e Dokumenteve të Sigurimit të Shtetit” është shprehur se deri më tani nuk është verifikuar asnjë zyrtar ministër apo qeveritar.
“Na kanë vënë aty për të mos zbuluar asgjë. Deri tani nuk kemi verifikuar asnjë zyrtar, ministër apo qeveritarë. Në këto 27 vjet ka patur kujdes të veçantë për të pastruar dosjet. Jam gati të largohem”, u shpreh Gumeni. (J.V/Shuplaka)
