Agjencia e Inteligjencës në Shtetet e Bashkuara të Amerikës mendon se Rusia ka vepruar fshehurazi për të promovuar manjatin Donald Trump në fushatën zgjedhore për zgjedhjet presidenciale që u mbajtën më 8 nëntor 2016.
Në një raport të “New York Times”, citohet se Inteligjenca ka dyshime të forta për përfshirjen e Rusisë. Edhe CIA sipas “Washington Post”, mban të njëjtin qëndrim. Por ekipi i Trump i hodhi poshtë këto akuza duke u shprehur: “Këta janë të njëjtët njerëz që thanë se Saddam Hussein kishte armë të shkatërrimit në masë.”
Edhe zyrtarët rusë kanë mohuar vazhdimisht akuzat për hakim. Ditën e premte, presidenti ende në detyrë i SHBA-ve, Barack Obama, urdhëroi nisjen e një hetimim për një sërë sulmesh të kryera në internet, për të cilat fajësohet Rusia.
Zyrtarë të lartë të administratës në SHBA, janë të bindur se hakerët ruse kanë ndërhyrë edhe në sistemet kompjuterike të Komitetit Kombëtar Republikan, si dhe në ato të Partisë Demokratike.
Në një moment gjatë fushatës, Trump i bëri thirrje Rusisë që të gjente email-e që penalizonin kundërshtaren e tij Clinton, por më vonë u shpreh se thjesht ishte treguar sarkastik.
