Skuadra e Interit mori një fitore të rëndësishme mbrëmë në transfertë përballë Salernitanës. Zikaltrit triumfuan me rezultatin 0-4 ku protagonist absolut ishte Lautaro Martinez. Argjentinasi shënoi 4 herë në portën e vendasve për vetëm 27 minuta.
Pjesa e parë u mbyll me rezultatin e bardhë 0-0. Me fillimin e së dytës Inzaghi aktivizoi në fushë shqiptarin Kristjan Asllani, i cili në një moment ishte pranë golit kur gjuajti një goditje dënimi, por topi shkoi ngjitur me shtyllën.
Lautaro e hapi serinë e golave në të 62-tën, për të dyfishuar më pas në minutën e 77. Në të 85-tën shënoi nga pika e bardhë e penalltisë dhe e vulosi fitoren në minutën e 89.
Me këtë fitore Inter merr sërish kreun e klasifikimit me pikë të barabarta me Milanin.
