Vitin e ardhshëm qeveria ka parashikuar të ngrijë një fond prej 3 miliard lekësh në pjesën e investimeve publike. Në rast se të ardhurat nuk realizohen në këtë nivel, ky fond do të jetë i pari që do të shkurtohet.
Shpenzimet kapitale, të cilat njihen ndryshe si investimet publike, janë më të rrezikuarat nga shkurtimi i buxhetit vitin e ardhshëm, nëse të ardhurat nuk realizohen sipas parashikimeve.
Në ligjin e buxhetit për 2017-ën është parashikuar se një fond prej 3 miliard lekësh do të jetë i ngrirë në formën e kontigjencës për të mbrojtur deficitin buxhetor në rast të mos realizimit të të ardhurave.
Vitin e ardhshëm, investimet publike është parashikuar të jenë sa 4.8% e PBB ose 76 miliardë lekë. Në këtë shumë përfshihet edhe Fondi i Zhvillimit Rajonal prej 9.5 miliard lekësh, dhe mbështetja buxhetore për Sektorin e Energjisë prej 1.5 miliardë lekësh).
Në planin e investimeve, sipas Ministrisë së Financave, janë mbajtur parasysh të gjitha detyrimet kontraktuale për projektet e investimeve me financim të huaj dhe të brendshëm të trashëguara nga viti 2013 dhe më parë.
Në strukturën e tyre, vërehet se gati 85% e vlerës së investimeve do të shkojë për financimin e projekteve në vazhdim.Ngrirja e forndeve te investimeve nuk është një risi për buxhetin e shtetit, edhe në 2016-ën, qeveria ngriu 2.5 miliard lekë nga shpenzimet kapitale. Ato u hoqën nga fondi i investimeve në ndryshimet që ju bënë buxhetit të shtetit gjatë Shtatorit me aktin e parë normativ.
Këtë vit, investimet publike, kapin vlerën më të ulët të dhjetë viteve të fundit, duke qënë me pak se 60 mld lekë. Për më tepër, ekonomistët kanë qënë kritikë në formën e investimeve, shkruan revista “Monitor”.
Pjesa më e madhe e fondeve kanë shkuar për rikonstruksione godinash, të cilat nuk kanë efekt në ekonomi. (A.R/SHUPLAKA)
