Filippo Inzaghi ka folur rreth transferimit të Romelu Lukakut tek skuadra e Romës. “Super Pippo” për “Il Messaggero” foli me superlativa për belgun duke e krahasuar edhe me Gabriel Batistutën. Ky i fundit u transferua nga Fiorentina tek Roma në fillim të viteve 2000 dhe menjëherë pati një impakt të jashtëzakonshëm me verdhekuqtë duke fituar “Scudetton” nën drejtimin e Fabio Capellos.
Inzaghi nuk la pa përmendur edhe vëllanë e tij Simonen që po bën një punë të shkëlqyer me Interin këtë fillim sezoni, por Pippo ishte i mendimit që Lukaku mund të qëndronte tek zikaltrit edhe këtë vit.
“Mendova se Lukaku do të qëndronte tek Inter, me Simonen”, u shpreh Inzaghi. “Në fund, megjithatë e kuptoj se ai shkoi në ekipin më të mirë për të. Efekti i Lukakut te Roma mund të jetë i njëjtë me atë që ka pasur Batistuta në atë qytet, a ju kujtohet ai?”
Më pas Inzaghi shton: Fitorja e Scudetto-s u diktua nga ardhja e argjentinasit, skuadra dhe tifozët u ndezën gjithashtu. Lukaku së bashku me Dybalan mund ta afrojnë Mourinhon në zonën e titullit, nuk e di nëse mund ta fitojnë. Belgu nuk mund të zgjidhte vend më të mirë nëse po kërkonte për stimul dhe vlerësim.
Discussion about this post