Presidenti i Iranit, Hassan Rouhani ka deklaruar se nuk do ta lejojë presidentin e zgjedhur të Shteteve të Bashkuara, Donald Trump, të shfuqizojë marrëveshjen globale bërthamore.
Gjatë fushatës zgjedhore, Trump ka deklaruar se do të anulonte paktin e Iranit me fuqitë e tjera botërore, sipas së cilës Teherani bie dakord të kufizojë programin e saj bërthamor në këmbim të heqjes së sanksioneve. Madje e ka cilësuar atë si “marrëveshjen më të keqe të negociuar ndonjëherë”.
Gjatë një fjalimi të mbajtur në Universitetin e Teheranit, presidenti Rouhan u shpreh: “Trump dëshiron të bëjë shumë gjëra, por asnjë prej veprimeve të tij nuk do të na prekë neve”.
“Vërtet mendoni se ai mundet ta anulojë Planin gjithëpërfshirës të veprimeve të përbashkëta të marrëveshjes bërthamore (JCPOA)? Mendoni se ne dhe kombi ynë do ta lejojnë atë të bëjë diçka të tillë?!”, ka vijuar më tej ai.
Fjalimi i presidentit u transmetua drejtpërdrejt në televizionin shtetëror iranian.
Përpara largimit të tij nga posti i presidentit, Barack Obama pritet të miratojë legjislacionin që zgjeron Aktin e Sanksioneve ndaj Iranit (ISA) për 10 vite, gjë që ia bën më të lehtë Uashingtonit të rivendosë sanksione nëse Teherani shkel marrëveshjen bërthamore.
“Nuk ka asnjë dyshim se Shtetet e Bashkuara janë armiku ynë. Nëse Obama nënshkruan ‘ISA’-n, por përdor edhe të drejtat për ndaluar implementimin e tij, kjo gjë do të shkelte sërish marrëveshjen bërthamore, ndaj dhe ne do të reagojmë.”, ka shtuar më tej presidenti Iranian.
Të mërkurën e 7 dhjetorit, Rouhan do të marrë pjesë në takimin e një komisioni ekspertësh, për të vendosur mbi reagimin e Iranit ndaj asaj që ai e quajti si “shkelje” nga ana e amerikanëve.
