Kriza në Lindjen e Mesme po thellohet, teksa Garda Revolucionare e Iranit ka konfirmuar nisjen e një vale të re raketash drejt Izraelit, që sipas autoriteteve iraniane janë “më të fuqishme” dhe “teknologjikisht më të avancuara” se ato të mëparshmet.
“Një valë e re sulmesh të ashpra nga forcat e armatosura, veçanërisht forcat tokësore të ushtrisë, me armë të reja dhe të përparuara ka filluar dhe do të intensifikohet në orët në vijim”, deklaroi komandanti i Forcave Tokësore, Kiomars Heidari, sipas agjencisë shtetërore IRNA.
Përshkallëzimi vjen në një moment kur tensionet mes Teheranit dhe Tel Avivit kanë arritur nivele kritike, ndërsa shtohen shqetësimet për një përplasje të gjerë ushtarake.
Ndërkohë, Shtetet e Bashkuara kanë marrë masa për të forcuar prezencën e tyre ushtarake në rajon. Dy aeroplanmbajtëse luftarake, USS Carl Vinson dhe USS Nimitz, janë aktualisht të pozicionuara në Detin Arabik.
Në rajon janë vendosur gjithashtu tre shkatërrues të pajisur me sisteme për interceptimin e raketave, ndërsa dy duzina cisternash për furnizim me karburant janë shpërndarë strategjikisht nëpër Evropë për të mbështetur operacionet në rast përshkallëzimi.
Zyrtarë amerikanë paralajmërojnë se përplasjet mes Iranit dhe Izraelit mund të kenë pasoja të gjera për sigurinë rajonale dhe ndërkombëtare, ndërsa diplomacia ndërkombëtare vijon përpjekjet për të frenuar një përshkallëzim të mëtejshëm.
