Prej 27 vitesh me dhjetëra familje të lagjeve 15 dhe 17 në qytetin bregdetar të Durrësit janë detyruar të bashkjetojnë me një kanal të madh të ujërave të zeza si dhe me rrugët e pashtruara anash tij.
Një ndër rrugët që përshkon ky kanal mban emrin “Rruga Gjelbërimi” ndërsa panorama që ofron është vetëm ky kanal i ujërave të zeza që për shkak të papërgjegjshmërisë së shumë banorëve por edhe neglizhencës së institucioneve vendore është kthyer dhe në një vendgrumbullim mbetjesh urbane, që pa frikë mund të quhet masakër mjedisore.
Ky kanal me kalimin e viteve është zgjeruar, teksa nëse nuk rehabilitohet rrezikon që banesave të tu shkojë në oborre si peshqesh i neglizhencës së pushtetit vendor, që për shtruar sheshin çdo vit nuk kursen para.
Rreth viteve 1998 kur banorët e parë kanë ardhur këtu Kryetar Bashkie ka qene ,Arqile Gorrela, teksa atë e pasoi Miri Hoti, më pas Lefter Koka dhe 3 tre mandatesh Bashkinë e drejton Vangjush Dako, pavarësisht gjithë këtyre emrave që pasuan njëri- tjetrin panorama për banorët mbetet e njëjtë.
Kjo lagje ndodhet rreth 2,5 kilometra nga qendra e qytetit të Durrësit, madje banorët janë taksapagues të rregullt e për ironi të fatit,ata paguajnë taksë gjelbërimi pikërisht për këtë kanal të ujërave të zeza.
Banorët rrëfejnë se për problemin e tyre kanë vënë në dijeni këshilltarët, krybashkiakun madje edhe kryeministrin, por ankesat e tyre kanë rënë në vesh të shurdhër, teksa për deputetët shprehen se nuk e kanë idenë se cili nga deputetët e listave të partive i përfaqëson.
