Ish-deputeti i Partisë Socialiste, Armando Prenga, nuk do të përfitojë nga amnistia. Ligji “Për dhënie amnistie” nuk favorizon Prengën për shkak se është funksionar publik dhe subjekt i ligjit për dekriminalizimin.
Në rast se Armando Prenga do të ishte qytetar i thjeshtë, atij do t’i amnistoheshin 2 nga 3 veprat penale që rëndojnë mbi të.
“Nuk përfitojnë nga ky nen të gjithë personat, të cilët mbajnë apo kanë mbajtur një funksion publik dhe që janë subjekt i ligjit nr. 138/2015 “Për garantimin e integritetit të personave që zgjidhen, emërohen ose ushtrojnë funksione publike”, të ndryshuar. Personat funksionarë publikë, të cilët ndiqen penalisht për çështjet në hetim, për çështjet e pashqyrtuara ose në proces shqyrtimi nga gjykatat, si dhe për kallëzimet që ndodhen në këto organe, pavarësisht nga data e regjistrimit të tyre, për veprat penale të kryera deri në datën 25 dhjetor 2016, do të vazhdojnë t’i nënshtrohen ndjekjes penale duke u hetuar dhe gjykuar, pavarësisht parashikimeve të këtij neni.”, citohet në nenin nr. 6 të ligjit “Për dhënie amnistie”.
Armando Prenga u ndalua nga policia pas përplasjes së 4 shtatorit 2015 mes familjeve Prenga e Cali në Laç. Emri i tij eshte lakuar shume herë nga opozita si i lidhur me aktivitete kriminale. (XH.A/SHUPLAKA)
Discussion about this post