Ish-deputeti Luan Rama ka ndarë me ndjekësit e tij momentet e veçanta të ndjekjes së një meshe në kishën e selitës, në Mirditë të mbajtur nga dom Gjergj Meta.
“Nuk kisha marrë pjesë asnjëherë më parë në një meshë. Ndaj dua ta falenderoj me shumë mirësi Dom Gjergj Metën që ma krijoi këtë mundësi fatlume”, shkruan Rama ndër të tjera.
Ai shprehet se kjo vizitë i kishte dhënë mundësinë e rikthimit në ato vise ku është rritur por duke shtuar se qyteti pranë të cilit ndodhet kasha, kishte të jetonte vetëm 40-vjet, “pothuaj pak a shumë sa mesatarje e moshës së shumicës së minatorëve për të cilët ai u themelua si qytet”, shkruan Rama.
Statusi i plotë:
Në kishën e Selitës…
E magjishme. Kështu mund ta cilësoj me një fjalë të vetme, ndjesinë që përjetova duke marrë pjesë në meshën e Dom Gjergj Metës në kishën e Selitës, bashkë me miqtë e mi Viktor Gjikola, Ndue Dedaj, Shaban Sinani dhe Bardhok Pulaj.
Nuk kisha marrë pjesë asnjëherë më parë në një meshë.
Ndaj dua ta falenderoj me shumë mirësi Dom Gjergj Metën që ma krijoi këtë mundësi fatlume.
E para, sepse ai është për mua një mik i vyer që gjithmonë me krijon një qasje krejt tjetër marrdhënieje mes vetes e Zotit, marrdhënie në të cilën unë përfshihem natyrshëm me tërë magjepsjen që ajo mbart.
Dhe e dyta, duke zgjedhur meshën e dedikuar në kishën e Selitës në Kurbnesh, më dha mundësinë e rikthimit në ato vise ku jam rritur, ani pse qyteti nuk është më, duke shënuar rastin e vetëm në botë të një qyteti që jetoi vetëm 40 vjet, pothuaj pak a shumë sa mesatarje e moshës së shumicës së minatorëve për të cilët ai u themelua si qytet.
E mesha e Dom Gjergj Metës, është edhe një përshpirtje hyjnore, dashurie e mirënjohjeje bashkë, për shpirtin e qytetit dhe ish banorëve të tij.
Zoti qoftë gjithmonë me ta!
(F.GJ/FAXWEB.AL)
