Ish drejtori i Arkivave, Kastriot Dërvishi ka komentuar këngën e kryebashkiakut, Tërmet Peçi për diktaktorin Enver Hoxha. Ai ironizon me faktin që Peçi menjëherë pasi mori pjesë në ceremoninë e 23 gushtit në nder të viktimave të komunizmit, i këndoi edhe komandantit legjendar të krimit.
“Para tre ditësh, më 15 shtator, kryetari i Bashkisë së Tepelenës organizoi disa ceremoni me rastin e “75-vjetorit të çlirimit të Tepelenës”, të cilat përfunduan suksesshëm me këngë për komandantin legjendar të krimit, tallonave, fukarallëkut dhe gazepit. Kjo gjë bëhej vetëm pak ditë pasi në mënyrë të sikletshme, Tërmet Peçi u pa në ceremoninë e 23 gushtit, në përkujtim të viktimave të komunizmit në ish kampin e internimit tela me gjemba të Tepelenës. Në profilin e tij të fb nuk gjendet asgjë nga ceremonia e 23 gushtit, ndërsa është shpikur “çlirimi i Tepelenës” për të kënaqur nostalgjikët e komunizmit dhe për t’iu dhënë rastin”, shkruan ai.
Dërvishi tallet edhe me ftesat e Peçit, që ka përfshirë vetëm anëtarët e Byrosë Politike dhe jo persona që kanë lidhje vërtet me çlirimin e Tepelenës.
Kujtojmë që para 3 ditësh me rastin e 75 vjetorit të çlirimit të Tepelenës, Peçi në një video të publikuar, shfaqej duke i kënduar Enver Hoxhës nën shoqërinë e miqve të tij dhe drejtuesve lokalë të PS.
Postimi i tij
Në librin “Kronikë e ditëve të stuhishme” (botimi i dytë, i Drejtorisë Politike të Ushtrisë Popullore, përgatitur nga Lefter Kasneci, Raqi Janushi, Stiliano Sallabanda e plotësuar nga Hysni Berdaj), Tiranë 1972, nuk figuron kurrfarë date për “çlirimin” e Tepelenës. Mund të gjesh lloj-lloj datash, por jo për një “çlirim” apo betejë të zhvilluar në Tepelenë. As në burime arkivore nuk gjendet ndonjë ngjarje e tillë. Datat më të afërta për “çlirimeve” të deklaruara janë 18 shtatori 1944 për Gjirokastrën dhe 22 shtatori 1944 për Krujën. Kësisoj supozohet që “gjermanët e Gjirokastrës” të larguar më 18 shtator, kanë kaluar të qetë në Tepelenën e “çliruar” më 15 shtator.
Në ftesën e nënshkruar nga kryetari i bashkisë, Tërmet Peçi, me titull “Në emër të lirisë” paraqitej anëtari i mëvonshëm i Byrosë Politike të KQ të Partisë së Punës-Haki Toska si dhe Mustafa Matohiti, përkatësisht komisar dhe zëvendëskomisar të brigadës së 6-të komuniste. A thua kishte lidhje Hakiu me “çlirimin” e Tepelenës? Aspak. Edhe Matohiti është vrarë në 29 mars 1944 në betejën e Patosit, e kësisoj nuk ka lidhje me “çlirimin” e Tepelenës. Çfarë lidhje ka kjo brigadë me “çlirimin” e Tepelenës. Ajo u formua më 26.1.1944 në Përmet nga bashkimi i batalioneve “Asim Zeneli”, “Baba Abaz”, “Naim Frashëri” dhe “Abaz Shehu”. Në gusht 1944 brigada kaloi nga Këlcyra në Skrapar, u vendos në divizionin e 2-të komunist dhe u drejtua drejt Labinotit, Martaneshit e veriut. Pas luftimeve në veri, më 27.11.1944 kaloi kufirin shtetëror (të 1913-s). Por si gjëra krejt pa lidhje ishin edhe fotografitë e tjera e treguara që ishin të kësaj brigade. Referuar pamjeve të sjella nga bashkia dhe origjinalit të albumit nr.5 të Arkivit të PPSH-së, sipas numrave të origjinalit, fotot kanë këtë përmbajtje:
1-Mustafa Matohiti (pa datë)
2-Mustafa Matohiti në mes (dy të tjerët nuk dihen)
4-Bektash Bilimani (pa datë)
6-Partizanë në Drisht afër Vishegradit, më 2.6.1945
7-Partizanë në Mitrovicë më 11.4.1945
8-Sulo Veipi dhe MaksutMyrto (pa datë)
10-Partizanë (pa datë)
Asnjëra prej fotove pra nuk lidhet me “çlirimin” e Tepelenës.
(J.D/Faxweb.al)
Discussion about this post