Ish-drejtori i Policisë pas largimit të Çakos: Kam vetëm një këshillë për Ramën

Një nga paraardhësit e Haki Çakos e cilëson të pritshëm largimin e tij nga detyra e Drejtorit të Përgjithshëm.

 Në “Debati në Channel One” ish-drejtori i Përgjithshëm i Policisë, Fadil Canaj, deklaroi se  kur më shumë se gjysma e drejtuesve të policisë vendore ishin shkarkuar, detyrimisht edhe largimi i Çakos ishte i pritshëm.

Por Canaj shtoi se largimi i Haki Çakos nuk ishte lajm i mirë. “Me përjashtim të Bajram Ibrajt, të gjithë ne drejtorët e Policisë së Shtetit nuk e kemi mbaruar mandatin. Na ka emëruar politika por po kjo politikë na ka larguar nga detyra dhe kjo nuk është gjë e mirë. Çdo ministër kërkon të ketë drejtorin e vet të policise”, tha Canaj.

Ndërkohë Fadil Canaj shprehu mendimin e tij edhe se si duhet të zgjidhet drejtori i ri i policisë.

I pyetur nga gazetari Qafoku se nëse kryeministri do t’i kërkonte një këshillë se si duhet ta zgjidhej Canaj tha:“Kam vetëm një këshillë për Edi Ramën. Drejtorin e ri duhet të zgjedhë të mbështetur vetëm në ligj. Në të përcaktohet qartë dhe ai duhet të jetë oficer policie, të ketë kaluar karrierën normale brenda policisë, të jetë i pastër moralisht, i papërfolur dhe të zbatojë ligjin”.

Ndërkohë në media janë përfolur deri tani dy kandidatura si zëvendësues të Çakos. Ata janë Ardi Veliu, drejtor aktual i Policisë së Tiranës dhe Eduard Merkaj aktualisht drejtor i SHÇB. (J.V/Faxweb)