Ish-drejtuesi i Lartë i Policisë Mithat Havari reagon pas një lajmi se drejtoria e gjimnazit të Patosit, u ka kërkuar nxënësve të kontribuojnë me nga 20 mijë lekë të vjetra secili, për printerin e shkollës, në mënyrë të të nxirreshin formularët e nevojshëm për provimet e maturës.
Duke marrë shkas nga kjo histori, Havari tregon një eksperiencë të tij të pak viteve më parë, kë kohën kur ai ishte komisar në qytetin e Përmetit.
Përmes historisë që ai tregon, Havari shprehet se si PS-ja ashtu edhe PD-ja janë njëlloj, ndaj edhe shteti vazhdon të mos jetë dinjitoz kur vazhdon ende edhe sistemi i lypjes.
REAGIMI I HAVARIT
Drejtoria e gjimnazit në Patos ju kishte kërkuar maturantëve të jepnin nga 2000 lekë të vjetra për printerin e shkollës që të nxirreshin formularët Az2 etj.
Mu kujtua momenti kur mora detyren e komisarit të policisë në Përmet dhe sekretarja me informoi se nuk kishte bojë printeri.
E pyes, po drejtoria ekonomike nuk ka gjendje?. Jo mu përgjigj sekretarja .
Kërkova një biznesmen serioz. E gjetën dhe ma sollën në zyrë.
I ngrati po qëndronte serioz me duart mbi tavolinë sikur ishte i pandehur. Urdhëro komisar, përse më kini thirrur? Qesha dhe i kërkova të mos shqetësohej se nuk e kisha thirrur për probleme me ligjin. “Për çfarë?”, vazhdoi.
Shteti është i mbaruar zoti biznesmen, nuk ka lekë të blejë një bojë printeri për komisariatin.
Të lutem mbi problemet që keni, na blij një bojë printeri të mirë, jo nga ata sorrogatot që blen drejtoria me tender.
U lehtësua i shkreti, buzeëqeshi, jo një tha por dy.
Kështu bleu dy të tilla me 90 dollarë copën, kuptohet origjinale.
Bënë dokumentacionin e nevojshëm për të mos më akuzuar për korrupsion dhe printeri filloi të punonte, sekretarja u lumturua se më në fund për nja dy vjet s’do kishte nevojë për bojë, por e shkreta nuk e gëzoi dot, se rilindja e nxorri në rrugë pa punë.
Kështu miqtë e mi kjo është panorama e shtetit shqiptar, pavarësisht kush qeveri është në pushtet.
Kur isha unë në Përmet ishte PD në qeveri, tani në Patos ku drejtoria kërkon lekë nga nxënësit është PS.
Vazhdon sistemi i lypjes dhe shteti vazhdon të mos jetë dinjitoz! (D.D/Shuplaka)
