Elvis Kabashi nuk është një emër i panjohur për sportdashësit shqiptar, kohë më parë ai refuzoi Kombëtaren Shqiptare pasi shpresonte të luante me Italinë, duke qenë se kishte dhe një kontratë me gjigandët e Juventus.
Mirëpo Kabashit gjërat mesa duket nuk i kanë shkuar si duket dhe tani përveç se me dështimin në karrierën futbollistike duhet të vuajë edhe pasojat e përballjes me drejtësinë italiane.
Rreth orës 01.30 të mbrëmjes së djeshme, ai ka shkaktuar një aksident të rëndë automobilistik në “Forte Dei Marmi” ku janë përfshirë dy makina dhe një motor. Sipas mediave italiane, një makinë Mercedes që drejtohej nga Kabashi, ka goditur një makinë Fiat duke nisur dinamikën e përplasjes. Pas kontrollit të policisë, Kabashi rezultoi pozitiv ndaj testit të alkoolit dhe si masë parandaluese i është hequr patenta ndërsa hetohet ngjarja nga e cila kanë mbetur të plagosur tre persona.
Nga aksidenti një 33-vjeçare është në gjendje të rëndë. Një 41-vjeçar dhe një vajzë tjetër kanë pësuar dëme më të lehta. (B.H/Shuplaka)
Discussion about this post