Lideri i së majtës ekstreme në Francë, Jean Luc Melanson, ka deklaruar se shteti i Kosovës është sajim i SHBA-ve vetëm për të marrë territore të reja, ndërsa në asnjë moment nuk i përmend krimet e luftës që Serbia i ka kryer në Kosovë.
Melanson fajësoi SHBA-në për destabilizim të rendit ndërkombëtar në rastin e Kosovës. Ai tha se pasojat e bombardimit të ish-Jugosllavisë po i vuajmë sot.
Këtë deklaratë ai e dha vetëm një ditë para se të sulmohej Konsullata e Kosovës në Strabourg, ku u vodh flamuri dhe u dëmtua stema e shtetit të Kosovës.
Melanson nuk heziton të përdorë gjuhën që zakonisht dëgjohet nga politikanët serbë prej disa vitesh për Kosovën. Ai ka fajësuar SHBA-të se kanë destabilizuar rendin ndërkombëtar me aksione agresive, madje duke vlerësuar se bombardimi i Serbisë nga NATO-ja gati 20 vjet më parë ishte i panevojshëm.
“Kjo ngjarje kishte rëndësi në destabilizimin e rendit ndërkombëtar, për çka sot i vuajmë pasojat. Kur e bombarduan ish-RFJ, SHBA-të u proklamuan si mbrojtës të minoriteteve dhe të së drejtës, vetëm për të arsyetuar intervenimin ushtarak, ashtu siç ndodhi më vonë me rastin e Irakut. Dhe ashtu siç veprojnë kudo. Si zakonisht këtë e bëjnë për të marrë një zonë të caktuar”, ka thënë deputeti i parlamentit të Francës, i cili nuk arriti të kalonte në raundin e dytë të zgjedhjeve për president të vendit më 2017.
Kujtojmë që pak kohë më parë ishte zëvendëskancelari austriak Heinz-Christian Strache, që foli për autonominë e Veriut dhe që Serbisë të mos i bëhet presion për ta njohur Kosovën. Deklarata e Heinz-Christian Strache shkaktoi debat jo vetëm në Kosovë por edhe në Austri ku vetë Sebastian Kurz reagoi dhe tha se Austria mbështet Kosovën. (B.H/Faxweb)
