Ish-fubollisti kroat Matko Djarmati, i cili është ndër kroatët që kanë lënë gjurmë në futbollin shqiptar. Ish-lojtari i Skënderbeut, Kastriotit, Dinamos, Besës dhe Tërbunit e cilëson një ndeshje delikate këtë të sotmen, por thekson se shanset më të mëdha i ka Skënderbeu.
Në një intervistë për “Panorama Sport”, ish-futbollisti i bën një thirrje edhe mikut të tij Marko Radas: “Luani si në Zagreb dhe kualifikoheni! Por kujdes Sudanin…!”.
INTERVISTA E PLOTË:
Matko, sa shanse ka Skënderbeu me Dinamon?
Ka shumë. Nëse i referohem thënies së Radasit para ndeshjes në Zagreb, kur ai deklaroi se shanset ishin 60- 40 për kroatët, tani mendoj se është e kundërta: ka 60% shanse Skënderbeu.
Këtë nuk e them për t’i bërë qejfin Skënderbeut dhe as sepse jam tifoz i Rijekës (rivalë të përjetshëm të Dinamo Zagrebit). E them sepse pashë një Dinamo shumë të dobët në Zagreb dhe një Skënderbe me më shumë dëshirë dhe më i disiplinuar.
Si mund t’ia dalë Skënderbeu sot?
Duhet të luajë njësoj si në ndeshjen e parë. Të qartë, agresivë dhe të thjeshtë. Nëse luajnë kështu, jam i bindur që të kalojnë.
Çfarë këshille do t’i jepnit mikut tuaj Marko Radas?
Që të luajë si në ndeshjen e parë, por duhet të kenë kujdes Sudanin.
Kaq i rrezikshëm ju duket Sudani?
Shumë. Është lojtari më i mirë i dy viteve të fundit në Kroaci. Ai është “Latifi” i Dinamos. Imagjinoni pak të luajë sot Skënderbeu pa Latifin…!
Po Çoriç?
Lojtar shumë i mirë, por nuk është në ditët e tij më të mira. Edhe në ndeshjen kundër Skënderbeut nuk u ndërrua se ishte i dëmtuar, por sepse ishte lojtari më i dobët në fushë. Ky është një problem shumë i madh për ta.
(B.H/Shuplaka)
