Ish-ministri i Jashtëm, Alfred Serreqi ka mohuar në mënyrë kategorike një deklaratë të botuar në një media të shkruar që fliste për një promemorie për rrëzimin e qeverisë Meksi të vitit 1997.
Serreqi ka thënë se nuk ishte shprehur në ndonjë gazetë për rrëzimin e qeverisë “Meksi” dhe se e përgënjeshtron këtë lajm.
“Me 20 shkurt , “GSH” botoi artikullin me titull “Intervista/Ish-ministri i Jashtëm: Shkëputja nga PD në 1997, Berishën do e gjykojë historia. Së pari, dua të sqaroj të gjithë lexuesit dhe opinionin publik se unë, Alfred Serreqi, nuk kam dhënë asnjëherë asnjë intervistë, as intervistën në fjalë, për asnjë organ të shtypit shqiptar, në respekt të një vendimi që e kam marrë që në vitin 1997. Kam komunikuar me drejtuesit e “GSH” dhe kam kërkuar prej tyre që të bëjnë përgënjeshtrimin, por kjo gjë nuk ka ndodhur. Në këto rrethana detyrohem të drejtohem në gjykatë për të gjetur një zgjidhje ligjore, gjë që do ta bëj, por më së pari, detyrohem të shprehem publikisht për të korrigjuar disa opinione të shprehura kinse nga unë, që cenojnë figurën time e bien ndesh me mendimet e mia” shprehet Serreqi.
“Ne kërkonim atë që kemi shkruar në promemorie, që të rrëzohej qeveria që ishte në ’97-ën, si një shans për të rihapur një debat publik, një tavolinë politike le ta quajmë kështu, një bashkëqeverisje edhe me palët e tjera. Në fakt, kjo gjë u bë, por u bë me vonesë. E bëri Berisha, por e bëri me vonesë. Kjo ishte e para. Së dyti, që personazhi i presidentit të mos futej më në skenën partiake. T’i ktheheshim një shteti institucional që presidenti duhet të rrijë mbi palët dhe jo siç u angazhua me një palë. E treta, duhej të gjendej një zgjidhje, qoftë edhe provizore që kishte të bënte me problemin financiar, pasi njerëzit kishin humbur paratë dhe kishin dalë në rrugë”, Serreqi citohej duke “thënë” mes të tjerave në artikull.
“Nuk është e vërtetë intervista në gojën time, ajo që është botuar një javë përpara nuk është e imja” mohon ish-ministri Serreqi. (M.D/ Shuplaka)
Discussion about this post