Ish-Presdenti i Republikës, Bujar Nishani, ka reaguar lidhur me situatën aktuale politike në vend, ku studentët vijojnë protestat e tyre kundër qeverisë, të cilës i kanë kërkuar plotësimin e 8 kërkesave të parashtruar prej ditësh.
Me anë të një postimi në rrjetet sociale, Nishani shkruan se studentët janë në protestë masive për të drejtat dhe liritë sociale dhe akademike, ndërsa shton se po protestohet ndaj një kryeministri të korruptuar, i vetmi kryetar qeverie pa një diplomë universiteti që nga koha e rrëzimit të diktaturës komuniste.
Sipas tij, përpjekjet e Kryeministrit duke kërkuar dialog, sulmuar rektorët e dekanët etj., nuk janë gjë tjetër pos “përpëlitje të dështuara të një kaste pushteti të korruptuar, të degraduar e në ikje për ta kufizuar protestën e tyre masive si përfaqësim të partive politike kundërshtare”.
Postimi i plotë:
Studentët shqiptarë në protestë masive për të drejtat dhe liritë e tyre sociale dhe akademike. Kundër një Kryeministri të korruptuar i cili është kryeministri i vetëm pa një Diplomë Universitare që nga koha kur në Shqipëri u rrëzua diktatura komuniste dhe u vendos sistemi demokratik pluralist politik.
Asnjë argument dhe arsyetim normal prej këtij kryeministri kundër kërkesave të studentëve.
Përpëlitje të dështuara të një kaste pushteti të korruptuar, të degraduar e në ikje për ta kufizuar protestën e tyre masive si përfaqësim të partive politike kundërshtare.
Një propagandë mjerane për “popullin armik”.
E qartë që studentët as kompleksohen , as përçahen e as tërhiqen nga propaganda e një njeriu që as nuk e njeh, as nuk e kupton e as i afrohet dot jetës universitare studentore.
(B.B/ Faxweb.al)
