Gjatë vitit 2017, ish-të përndjekurit politikë do të mund të përfitojnë në total 2 miliardë lekë. Ministria e Financave ka përcaktuar kategoritë që kanë prioritet për të marrë kompensimin nga të afërmit që kanë vuajtur në burgjet e sistemit komunist.
Të parat që renditen në listë janë grat, ish-të dënuara që jetojnë në momentin e pagesës. Në kategorinë e dytë me prioritet janë persona ish-të dënuar mbi 75 vjeç në datën e hyrjes në fuqi të ligjit që vazhdojnë të jenë gjallë.
Kategoria e tretë përfshin persona ish-të dënuar politikë të gjallë që vuajnë nga sëmundje të rënda. Në kategorinë e katërt me prioritet janë personat ish-të dënuar që janë gjallë që pavarësisht moshës, në momentin e pagesës kanë fëmijë të mitur nën moshën 18 vjeç.
Ndërsa kategoria e pestë përfshin personat ish-të dënuar që nuk jetojnë, por në momentin e pagesës kanë trashëgimtarë të radhës së parë në moshë të mitur nën 18 vjeç. Kategoria e fundit, kategoria e gjashtë përfshin personat ish-të dënuar që janë gjallë dhe në momentin e pagesës nuk kanë mbushur 75 vjeç.
Sa i përket ndarjes së fondit, “GSH” bën me dije se “fondi i vënë në dispozicion nga buxheti i shtetit prej 2 miliardë lekësh do të shpërndahet brenda vitit 2017 për 23 mijë dosje ish-të përndjekurish politikë të cilët janë për t’u trajtuar financiarisht.”
Fillimisht, do të bëhet shpërndarja e këstit të shtatë dhe të tetë për për përfituesit që janë pjesë e skemës parësore, për të vijuar me shpërndarjen e kësteve të mbetura për kategorinë joparësore. (XH.A/SHUPLAKA)
