“Isha kundër shembjes së Teatrit”, habit Auron Tare: Do shkoja në protestë bashkë me shumë të tjerë, ja ç’më ndaloi

Studiuesi Auron Tare, njëkohësisht anëtar i këshillit shkencor të UNESCO-s dhe që njihet si një person i afërt me kryemninistrin Edi Rama, deklaroi se ka qenë kundër shembjes së Teatrit Kombëtar. Tare e ka konsideruar godinën që tashmë është shndërruar në gërmadhë, si jë vlerë e rëndësishme e epokës fashiste në Shqipëri.

Ai tha në TCH se do të dëshironte që të merrte pjesë në protestën për shembjen e Teatrit Kombëtar, por që pjesëmarrja e opozitës ka bërë që të hezitojë.

“Unë kam qenë për ruajtjen e teatrit si një vlerë të rëndësishme edhe e trashigimisë të epokës fashiste në Shqipëri. Kushdo që ka lindur dhe është rritur në këtë qytet ka kontaktin emocional. Në kohën e rinisë tonë, Teatri ishte një çështje e rëndësishme kulturore, sociale, etj. Unë nuk do të shkoj në protestë, sepse kam parë që çështja e teatrit është bërë thellësisht politike. Njerëz pa kauzë. Kjo ja heq vlerën debatit.

Sepse po të shikosh, të dy liderët e opozitës kanë qenë 10 vite në pushtet, nuk kanë bërë asgjë për teatrin, as për aktorët, as për godinën, nuk kanë bërë asgjë fare. Pardje nuk e patë si u rrahën ato njerëzit atje. Edhe shumë njerëz që unë njoh, njerëz të mirë, e donin teatrin dhe e duan, që jam i sigurt që do të dilnin atje. Në momentin që shikojnë që e gjithë kauza e teatrit po bëhet teatër, nuk shkon njeri”